SQO-da bıyl úsh myńnan astam adam jelsheshek juqtyrdy

PETROPAVL. KAZINFORM – Soltústik Qazaqstan oblysynda jelsheshekpen aýyrǵandar sany azaıdy.

SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, jelsheshek - maýsymdyq dert, ádette kúz-qys aılarynda aýrýshańdyq artady. Bıylǵy 9 aıda jalpy 3 042 adam aýyrǵan. Sonyń ishinde 2 402-si nemese 78,9% jyldyń alǵashqy tórt aıynda anyqtalǵan. ıAǵnı, qańtarda – 676 jaǵdaı, aqpanda sol shamalas jáne naýryzda 560 jaǵdaı tirkelgen. Al shilde, tamyz, qyrkúıek aılarynda syrqattanǵandar sany 100-ge tolmaıdy.

Mamandar búginde jelsheshekke qatysty epıdemıologııalyq jaǵdaı turaqty dep baǵalap otyr. Sanıtarlyq-epıdemıologııalyq baqylaý mekemeleri aldyn alý sharalaryn jalǵastyryp, ásirese kúz-qys maýsymy aldynda jaǵdaıdy baqylaýǵa alǵan. Sebebi bul kezeńde aýrýdyń qaıta dendeý qaýpi bar.

Dárigerlerdińı aıtýynsha, jelsheshek – aýa tamshylary arqyly juǵatyn, dene qyzýy kóterilip, ıntoksıkatsııamen jáne keń taralǵan vezıkýlezdi bórtpemen sıpattalatyn jiti ınfektsııalyq aýrý.

Infektsııa kózi - aýrý adam, sondyqtan aýyrǵan jáne saý adamdar arasyndaǵy baılanysty shekteý óte mańyzdy. Inkýbatsııalyq kezeń 10-nan 21 kúnge deıin sozylady.

Ádette temperatýra birden 39-40 gradýsqa deıin kóteriledi, syrqattyń basy aýyrady. Jelsheshektiń eń aıqyn belgisi –bórtpe shyǵyp, ol qyshıdy.

Mundaıda eń bastysy – jaranyń qabyǵyn almaý, terini tyrnamaý. Tyrtyqtar qalyp qoımaýy úshin terige tıispegen jón. Eger dene qyzýy 39-dan assa, bórtpe paıda bolsa, dárigerge dereý kóringen jón.

Buǵan deıin Almatyda balalar arasynda jelsheshektiń asqynǵan túri jıilep ketkenin jazǵan edik.