SQO-da bıyl úsh adam brýtsellez juqtyrdy
PETROPAVL. KAZINFORM — Soltústik Qazaqstan oblysynda brýtsellez juqtyrǵandardyń bireýi — Petropavl turǵyny, qalǵan ekeýi Shal aqyn aýdanynan.
SQO sanıtarııalyq-epıdemıologııalyq baqylaý departamentiniń málimetinshe, dertti juqtyrǵandardyń barlyǵy eresekter. Olar qajetti em qabyldap, dıspanserlik esepke alyndy. Endi dárigerlerdiń baqylaýynda bolady.
— Shal aqyn aýdanynda ınfektsııany juqtyrǵandar aýrý maldy baqqan. Olardyń jeke aýlasyndaǵy qoıdan brýtsellez anyqtaldy. Al Petropavl turǵynynyń bul dertti qaıdan juqtyrǵany belgisiz, — deıdi departamenttiń bas mamany Tolqyn Qajenova.
Brýtsellez, ıaǵnı, saryp janýarlar men adamdardyń qaýipti juqpaly aýrýy. Ony brýtsella mıkroby týdyrady. Adamdarǵa dert aýrý maldan taraıdy.
— Adamdarda aýrý belgisi ınfektsııany juqtyrǵannan keıin ádette 2-3 aptadan keıin paıda bolady. Dene qyzýy kóterilip, qaltyraý, qatty terleý, álsizdik paıda bolyp, tábet tómendeýi múmkin. Keıin bas aýrýy, uıqynyń buzylýy baıqalyp, býyndar aýyra bastaıdy. Ásirese iri býyndar zaqymdanyp, isinýi múmkin, — deıdi sanıtar dáriger.
Ásirese mal tóldegen kezde sarypty juqtyrý qaýpi artady. Óıtkeni bul ýaqytta bakterııa tól, shý jáne zár arqyly kóp mólsherde bólinedi eken. Sondaı-aq ınfektsııa aýrý maldy kútip-baptaý kezinde, mal soıý barysynda, zaqymdanǵan teri arqyly, las qolmen kóz, muryn nemese aýyzdy ustaǵanda juǵýy múmkin.
Sonymen qatar, mamannyń aıtýynsha, shıki sút, qaınatylmaǵan sút ónimderi, jetkilikti termııalyq óńdeýden ótpegen et arqyly da taraýy múmkin.
SQO veterınarııa basqarmasynyń málimetinshe, jalpy óńirde brýtsellez boıynsha epızootııalyq jaǵdaı turaqty.
Mamandardyń aıtýynsha, bıyl óńirde Esil aýdanyndaǵy Ilınka aýylynda aýrý oshaǵy anyqtaldy. Munda iri qara maldan saryp tabylǵan. Búginde eldi mekende barlyq veterınarııalyq-sanıtarııalyq sharalar tolyq júrgizilip, shekteý sharalary alyndy.
Jyl basynan beri oblys boıynsha brýtsellezben aýyrǵan 53 bas iri qara jáne 4 usaq mal anyqtaldy. Ótken jyly 640 qara mal men 12 qoı-eshki aýyrǵan.
Veterınarııalyq-sanıtarııalyq talaptarǵa sáıkes aýrý maldyń kózi joıyldy. Qora-qopsy tolyq dezınfektsııadan ótti.
Buǵan deıin Shyǵys Qazaqstanda adamdar arasynda brýtsellez juqtyrǵandar sany artqanyn jazǵan edik.
