SQO-da bıyl ulttyq joba aıasynda aýyldarda 40-qa jýyq medıtsınalyq nysan qurylysy bastalmaq
PETROPAVL. KAZINFORM – Soltústik Qazaqstan oblysynyń medıtsınalyq uıymdary jańa 19 sanıtarlyq avtokólikpen tolyqty. Onyń jartysy aýyldarǵa jiberildi.
Medıtsınalyq sanıtarlyq kólikter qyzmet sapasyn jaqsartý úshin alynǵan. SQO Densaýlyq saqtaý basqarmasynyń basshysy Qumar Kúsemisovtiń aıtýynsha, óńirdiń emdeý mekemeleriniń mashına parkin tolyq qamtý úshin áli de 52 kólik qajet. Máseleni sheshý úshin qostanaılyq mashına shyǵaratyn zaýytpen kelissóz júrgizilip jatyr.
«Jańa kólikterdiń 12-si - «Sobol», bireýi 24 mln teńge turady. Qalǵany JAC, quny 20 mln teńge shamasynda. Respýblıkalyq jáne jergilikti bıýdjetten qarajat bólindi. «Soboldiń» tórteýin jedel járdem stantsııasyna berdik. Qalǵany turǵyndarǵa shuǵyl kómek kórsetý úshin aýdandarǵa jóneltiledi. Aýdan ortalyqtarynda sanıtarlyq kólikterge suranys joǵary. Sonymen qatar, Qostanaıda qurastyrylǵan JAC markali 7 kólik satyp alyndy. Olar Petropavldaǵy 3 qalalyq emhanaǵa berildi. Taǵy bireýi Taıynsha aýdanynyń aýrýhanasyna jiberiledi», - deıdi Qumar Kúsemisov.
Medıtsınalyq sanıtarlyq kólikterdiń kiltin oblys ákimi Ǵaýez Nurmuhanbetov saltanatty túrde tabystady.
«Kólik parkin jańartý jumysy jalǵasyn tabady. Bıyl densaýlyq saqtaý salasyn úlken ózgerister kútip tur. «Aýyldyq densaýlyq saqtaýdy jańǵyrtý» ulttyq jobasy aıasynda aýyldarda 38 medıtsınalyq nysannyń qurylysy bastalady. Bul dárigerlik ambýlatorııalar, FAP-tar men medpýnktter. Kishkenekól aýylynda jańa emhana ashylady. Sondaı-aq, kóktemde kópsalaly oblystyq aýrýhananyń qurylysyn qaıta jandandyrý josparlanǵan», - dedi Ǵaýez Nurmuhambetov.
Oblys ákiminiń aıtýynsha, aýrýhana, emhanalardy tehnıkalyq jabdyqtaý úshin bıyl bıýdjetten 5,1 mlrd teńge bólingen. Bul baǵytta jumys áli de jalǵasady. Byltyr Petropavlda eki emhana qoldanysqa berildi. Ulttyq joba aıasynda 8 medıtsınalyq nysan boı kóterdi.
