SQO-da bıyl turǵyndardyń demalyp, sýǵa shomylýyna 60 oryn ázirlenbek

PETROPAVL. KAZINFORM – Soltústik Qazaqstan oblysynda bıyl turǵyndar 13 kól men Esil ózeninde daıyndalǵan 60 orynda sýǵa shomyla alady. Demalys oryndarynyń altaýy – kommýnaldyq menshikte.

SQO tótenshe jaǵdaılar departamenti bastyǵynyń orynbasary Murat Qanǵojınovtyń aıtýynsha, óńirde 60 ózen, 2148 kól jáne 117 qazanshuńqyr bar. Sonyń ishinde Esil ózeni, Solenoe, Lebıaje, Úlken Torańǵul, Shalqar jáne Imantaý kólderi qaýipti sý aıdyndary bolyp esepteledi. Sońǵy 10 jyl ishinde sýǵa shomylýǵa arnaıy jaraqtandyrylǵan demalys oryndarynda bir de bir qaıǵyly jaǵdaı tirkelmegen.

«Byltyr SQO-da bes adam, sonyń ishinde bir bala sýǵa ketti. Sýǵa shomylý maýsymy qaýipsiz ótýi úshin tıisti sharalar qolǵa alyndy. Jedel-qutqarý otrıadynyń arnaıy jaraqtary daıyndaldy, bul jumysqa departamenttiń bólimsheleri, jergilikti atqarýshy organdar tartylady. Túsindirý, aldyn alý jumystary júrgizilip jatyr. Sýǵa shomylý maýsymy bastalysymen jedel-qutqarý otrıadynyń bazasynda apta saıyn «Qaýipsiz jaz» aktsııasyn uıymdastyramyz», - deıdi Murat Qanǵojınov. 

Aıta keteıik, jyl basynan beri el aýmaǵynda 12 adam sýǵa ketti, sonyń ekeýi – bala. Jalpy byltyr 177 adam, sonyń ishinde 53 balanyń ólimi sýdan boldy. 

Buǵan deıin Almaty oblysynda 40 shaqty týrıst mingen avtobýstyń apatqa ushyraǵanyn aıtqan edik.