SQO-da bıyl turǵyndardan 60 shaqty atys qarýy tárkilendi
PETROPAVL. KAZINFORM — Soltústik Qazaqstan oblysyndaǵy aýdandardyń birinde polıtseıler 61 jastaǵy aýyl turǵynynan birneshe qarý-jaraqty tárkiledi.
SQO Polıtsııa departamenti baspasóz qyzmetiniń málimetinshe, bul fakti mamyr aıynyń sońynda ótken oblystyq «Qarý» jedel-profılaktıkalyq is-sharasy aıasynda anyqtalǵan. Tártip saqshylary er adamnyń úıinen «TOZ-34» qos uńǵyly sholaq myltyqty, qoldan jasalǵan jaryq-dybystyq granatany, qoldan jasalǵan dúmi bar ańshylyq myltyqtyń uńǵy qorabyn, gılzalar jáne patrondar jasaýǵa arnalǵan quraldardy tapty.
— Onyń 2005 jylǵa deıin ańshylyq bıleti bolǵan eken. Aıtýynsha, sholaq myltyqty úıiniń shatyrynan, al atys qarýynyń mehanızmin qoqys ornynan taýyp alǵan, granatany otshashý retinde paıdalaný úshin ózi jasaǵan. Mundaı qoldan jasalǵan «pırotehnıkanyń» óz ómiri men densaýlyǵyna qaýip tóndiretinin oılamaǵan, — deıdi polıtseıler.
Qarýdy zańsyz saqtaý faktisi boıynsha qylmystyq is qozǵaldy. Jalpy, osy is-shara aıasynda tártip saqshylary 260 úıdi, sharýashylyqty tekserip, zańsyz saqtalǵan 11 qarý men 32 oq-dárini tárkiledi.
Polıtseıler oblys turǵyndaryn tirkelmegen qarýdy erikti túrde tapsyrý qajettigin eskertedi. Qarýdy óz erkimen tapsyrǵandarǵa ótemaqy bar. Óz erkimen tapsyrylǵan árbir qarý úshin onyń túri men tehnıkalyq jaǵdaıyna qaraı 10 AEK-ten 100 AEK-ke deıin, ıaǵnı 43 myń teńgeden 432 myń teńgege deıin syıaqy qarastyrylǵan. Sondaı-aq ony zańsyz saqtaǵany úshin qylmystyq jáne ákimshilik jaýapkershilikten bosatylady.
Jyl basynan beri SQO-da barlyǵy 59 atys qarýy tárkilendi, onyń ishinde 6 oıyq uńǵyly qarý jáne 3 sholaq myltyq bar.
Buǵan deıin Qazaqstanda qarý-jaraqty ákelý men áketýge qoıylatyn talaptar ózgergenin jazǵan edik.
