SQO-da bıyl týberkýlezben aýyrýdyń 70-ke jýyq jańa jaǵdaıy tirkeldi
PETROPAVL. KAZINFORM — Soltústik Qazaqstan oblysynda bıyl týberkýlezdi juqtyrý 19% tómendegen.
SQO ftızıopýlmonologııa ortalyǵynyń málimetinshe, týberkýlezdiń taralýyn tómendetýde aýrýdy erte anyqtaýdyń mańyzy zor. Osy maqsatta halyq profılaktıkalyq tekserýmen qamtylǵan.
Osy jyldyń alty aıynda 74 myńǵa jýyq adam flıýorografııalyq tekserýden ótti. Onyń nátıjesinde 52 adamda dert anyqtaldy.
Sonymen qatar aýyrý qaýpi joǵary toptarǵa erekshe kóńil bólingen. Osy kezeńde joǵary táýekel tobyndaǵy 29,5 myń adam tekserilip, olardyń 47-sinen týberkýlez anyqtaldy.
Mamandardyń aıtýynsha, balalar arasynda týberkýlezdiń aldyn alý jáne ony erte anyqtaý sharalary da júıeli túrde júzege asyrylyp keledi. Jyl basynan beri 14,2 myń balaǵa Mantý synamasy qoıyldy. Bul jyldyq jospardyń — 72%.
Odan ári qosymsha tekserýdi qajet etken shamamen 4,5 myń bala Dıaskın-testpen tekserildi. Tekserý nátıjesinde: 32 balada kúmándi, 126 balada oń nátıje anyqtaldy.
Búginde oblysta týberkýlezben aýyratyn naýqastardyń 80% ambýlatorııalyq jaǵdaıda em qabyldap jatyr. Onyń ishinde 71 naýqas emdi úıde beınebaqylaý rejıminde alady.
Buǵan deıin Petropavlda jasóspirimnen týberkýlezdiń ashyq túri anyqtalǵanyn jazǵan edik.
