SQO-da bıyl tirkeýsiz, qujatsyz júrgen 5 myńnan astam adam jaýapkershilikke tartyldy
PETROPAVL. KAZINFORM – Soltústik Qazaqstan oblysy toǵyz joldyń torabynda ornalasqandyqtan kóshi-qon jaǵdaıy polıtsııa departamentiniń únemi nazarynda. Bıylǵy jarty jyl ishinde QR zańnamasyn buzǵany úshin 201 sheteldik jáne 38 jumys berýshi ákimshilik jaýapkershilikke tartyldy.
SQO polıtsııa departamenti baspasóz qyzmetiniń málimetinshe, Jambyl aýdanynyń aýmaǵynda salynyp jatqan nysanda Ózbekstannyń bes azamaty anyqtaldy. Olardyń el aýmaǵynda jumys isteýge ruqsaty bolmaǵan. Nátıjesinde sheteldikter de, olardyń jumys berýshileri de ákimshilik jaýapkershilikke tartyldy. Sot sheshimimen sheteldik bes azamattyń barlyǵy Qazaqstannan shyǵaryldy.
«Jaz – bul demalys ýaqyty ǵana emes, halyqaralyq tranzıt artatyn, sondaı-aq sheteldikterdiń eńbek kúshin paıdalaný jıileıtin maýsym. Shekaraǵa jaqyn ornalasqandyqtan kóshi-qon jaǵdaıyn baqylaý polıtsııa departamenti jumysyndaǵy basym baǵyttardyń biri. Polıtseıler sheteldik azamattardyń jınalatyn oryndaryn, qurylys nysandaryn jáne basqa da oryndardy únemi tekserip otyrady. Máselen 6 aı ishinde halyqtyń kóshi-qony salasyndaǵy QR zańnamasyn buzǵany úshin 201 sheteldik jáne 38 jumys berýshi jazalandy», - deıdi SQO PD kóshi-qon qyzmeti basqarmasynyń bastyǵy Talǵat Ábilov.
Jyl basynan SQO-da kóshi-qon qyzmeti bólinisteriniń qyzmetkerleri Qazaqstan aýmaǵynda tirkeýsiz nemese jeke basyn kýálandyratyn qujatsyz turǵany úshin 5359 azamatty ákimshilik jaýapkershilikke tartqan. Jeke jáne zańdy tulǵalar tarapynan sheteldikter men azamattyǵy joq adamdardy qabyldaýdyń 302 deregi tirkeldi. El aýmaǵynan 57 sheteldik shyǵaryldy.
«Quqyq buzýshylyqtardy anyqtaý men aldyn alýdan bólek, kóshi-qon qyzmeti basqarmasy memlekettik qyzmettiń 12 túrin kórsetedi. Alty aı ishinde azamattyǵy joq 573 adam turýǵa yqtııarhat pen kýálikter alǵan. Jeke kýálik jasaýǵa 20054 ótinish jáne 12320 pasport resimdeldi. Jyl basynan kóshi-qon qyzmeti Qazaqstanda ýaqytsha bolýǵa 3600-den astam ruqsat qaǵazyn berdi», - deıdi Talǵat Ábilev.
Buǵan deıin SQO-da azyq-túlik baǵasyn negizsiz kótergenderdiń jazalanǵanyn jazǵan edik.
