SQO-da bıyl tórt orman órti tirkeldi

PETROPAVL. KAZINFORM — Soltústik Qazaqstan oblysynda ormanda órt qaýipsizdigin saqtamaǵandarǵa jyl basynan beri 1,2 mln teńgege jýyq aıyppul salyndy. 

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, oblys aýmaǵynda ormandy alqaptardy mamandar patrýldeý arqyly tekserip, órt-baqylaý munaralarynan jáne «Orman kúzetshisi» ınteraktıvti beınemonıtorıng júıesi kómegimen baqylaıdy.

Byltyr basqarmanyń qaramaǵyndaǵy memlekettik orman qory jerinde jalpy aýdany 9,89 gektar alańda 4 orman órti tirkeldi.

Mamandardyń aıtýynsha, qabyldanǵan aldyn alý jáne uıymdastyrý sharalary órttiń úlken aýmaqqa taralýyna jáne orman órtteriniń órshýine jol bermeı, jedel joıýǵa múmkindik berdi. Barlyq jaǵdaı boıynsha tekserý júrgizildi, qoldanystaǵy zańnamaǵa sáıkes sharalar qabyldandy.

Órtke qaýipti maýsym boıy memlekettik orman qory aýmaǵyndaǵy ormandy alqaptarda myńnan astam reıd júrgizilgen. Nátıjesinde órt shyǵýdyń 29 deregi tirkelip, olar ýaqtyly joıyldy.

Memlekettik orman kúzetiniń qyzmetkerleri órt qaýipsizdigi erejelerin buzǵany úshin 37 hattama toltyrǵan. Zań buzǵandarǵa 1 157,5 myń teńge somasyna 37 ákimshilik aıyppul salynyp, ol tolyq óndirilip alyndy.

Qazirgi ýaqytta ormanshylar qylqan japyraqty aǵashtardyń kúzetin kúsheıtti. Olardyń aıtýynsha, qaraǵaı ósýi úshin kem degende 15-18 jyl ýaqyt qajet. 

Buǵan deıin SQO-da shyrsha satýshylar baqylaýǵa alynǵanyn jazǵan edik. 

Qylqan japyraqty aǵashtardy merekege oraı kesýge jol bermeý úshin oblys aýmaǵynda mobıldi toptar qurylǵan.