SQO-da bıyl terezeden tórt bala qulap, aman qaldy
PETROPAVL. KAZINFORM – Soltústik Qazaqstan oblysy kópbeıindi balalar aýrýhanasyna osy jyldyń alǵashqy úsh aıynda túrli deńgeıdegi jaraqatpen 2800-deı bala júgingen.
Emdeý mekemesiniń travmatolog-ortoped dárigeri Shyńǵys Nurǵalıevtyń aıtýynsha, ótken jyldyń uqsas kezeńimen salystyrǵanda jaraqattanǵan balalar sany shamamen júzge artyq.
- Balalar jaraqaty máselesi jazǵy demalysta óte ózekti. Balalar kóp jaǵdaıda eresekterdiń baqylaýynsyz velosıped pen samokat tebedi, aýlada oınaıdy, sý aıdyndaryna barady. Sondyqtan jazataıym oqıǵalar sany dástúrli túrde artady.
Jaraqattardyń basym bóligi qarapaıym qaýipsizdik erejelerin saqtamaýdan bolady. Sondyqtan eresekterdiń basty mindeti - qaýipti jaǵdaılardyń týyndaýyna jol bermeý, - deıdi Shyńǵys Nurǵalıev.
Mamannyń aıtýynsha, sońǵy ýaqytta velosıped, samokat tepken balalar sany artqan.
Sonymen birge jol-kólik oqıǵalary da kóbeıip otyr. Negizgi sebep - joldy ruqsat etilmegen jerden kesip ótý, joldy kólikten túspeı kesip ótý, qozǵalys kezinde qulaqqap paıdalaný.
- Kóptegen jaraqattar turmystyq jaǵdaıda bolady. Úıde balalar ystyq sorpadan, peshten, útikten jáne jylytqysh quraldardan kúıip qalýy múmkin. Sonymen qatar dári-dármekterdiń, turmystyq hımııanyń, ótkir zattar men elektr quraldarynyń qoljetimdi bolýy da jazataıym oqıǵalarǵa sebep bolyp jatady. Sondyqtan barlyq qaýipti zattar balalardyń qoly jetpeıtin jerde saqtalýy tıis, - deıdi Shyńǵys Nurǵalıev.
Sonymen qatar kópqabatty úılerdiń terezelerinen balalardyń qulap ketý faktileri de artqan.
- Jazda balalardyń terezeden qulaý oqıǵalary jıi tirkeledi. Ókinishke qaraı, olardyń keıbiri ólimmen aıaqtalady. Keıbir ata-analar moskıt toryn qaýipsizdik quraly dep esepteıdi. Alaıda ol balanyń salmaǵyn kótere almaıdy. Sondyqtan terezelerge arnaıy bekitkishter men shekteý quraldaryn ornatqan jón.
Bıyl aýrýhanaǵa 2-3 qabattan qulaǵan 4 bala tústi. Olar búginde úılerine jiberildi, – deıdi maman.
Buǵan deıin elde balalar densaýlyǵyn saqtaýǵa bólinetin qarjy eki ese óskenin jazǵan edik.
