SQO-da bıyl tabıǵat qorǵaý zańnamasyn buzýdyń 25 faktisi anyqtaldy
PETROPAVL. KAZINFORM - Soltústik Qazaqstan oblysynda orman sharýashylyǵy men janýarlar dúnıesin qorǵaý maqsatynda bıyl 61 reıd uıymdastyryldy.
SQO orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, is-shara barysynda tabıǵat qorǵaý zańnamasyn buzýdyń 25 faktisi tirkeldi. Onyń 20-sy orman sharýashylyǵy salasyna, 5-eýi ańshylyq sharýashylyǵyna qatysty. Osy faktiler boıynsha 25 adam ákimshilik jaýapkershilikke tartyldy.
Byltyr mamandar 105 reıdtik is-shara ótkizgen. Nátıjesinde orman sharýashylyǵy jáne janýarlar dúnıesi salasyndaǵy tabıǵat qorǵaý zańnamasyn buzýdyń 76 faktisi anyqtaldy. Zań buzýshylyqtyń basym bóligi - orman sharýashylyǵyna qatysty. Nátıjesinde quqyq buzýshylar ákimshilik jaýapkershilikke tartyldy.
- Tabıǵat qorǵaý baǵytyndaǵy jumystardyń mańyzdy bóligi - zańsyz ań aýlaý faktileriniń aldyn alý jáne olardy anyqtaý. Byltyr brakonerliktiń 3 faktisi tirkelgen. 9 bas sibir eligin atyp alǵandar memleketke 14 mln 745 myń teńge zalal keltirdi. Onyń 11 mln 796 myń teńgesi óteldi, - deıdi orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Ivan Koh.
Mamannyń aıtýynsha, bıyl zańsyz ań aýlaýdyń 2 deregi anyqtaldy. Brakonerler 1 qaban jáne 1 sibir eligin atyp alǵan. Janýarlar dúnıesine keltirilgen zalal 4 mln 865 myń teńgege baǵalandy. Qazirgi ýaqytta onyń 3 mln 243 myń teńgesi óteldi.
Inspektsııa málimetinshe, SQO-da brakonerler negizinen sibir eligin nysanaǵa alady.
Buǵan deıin Almaty oblysynda 260 keli balyqty zańsyz aýlaǵan brakonerler sottalǵanyn jazǵan edik.
