SQO-da bıyl shomylý maýsymynda 3 adam qaza boldy

SQO Tótenshe jaǵdaılar departamentiniń málimetinshe, oblys shamamen 60 ózen, 2,3 myńnan astam kól jáne 127 qazanshuńqyr bar. Bıyl jazda turǵyndardyń demalýyna 61 oryn belgilendi. Onyń 13-i kólderde, qalǵany Esil ózeninde ornalasty. 6 demalys orny kommýnaldyq menshikte bolsa, 55 nysandy jeke kásipkerler paıdalanady. Sondaı-aq, demalys oryndarynyń basym bóligi — 47 nysan Shalqar jáne Imantaý kólderiniń mańynda jumys istedi.

— Shomylý maýsymy bastalǵanǵa deıin jergilikti atqarýshy organdarmen birlesip demalys oryndaryna komıssııalyq tekserý júrgizildi. Nátıjesinde tek 23 demalys aımaǵy ǵana talapqa saı boldy. Qalǵan nysandardyń ıelerine anyqtalǵan kemshilikterdi joıý jóninde usynymdar berildi, — deıdi Jedel-qutqarý jasaǵy basshysynyń orynbasary Qaırat Samaev.

Shomylý maýsymy bastalǵaly oblystyń sý aıdyndarynda úsh adam sýǵa batyp ketti. Aqjar aýdanyndaǵy Shat ózeninde, Ǵabıt Músirepov atyndaǵy aýdanyndaǵy jáne Petropavldaǵy Esil ózeninde oqys oqıǵalar tirkeldi. Olardyń barlyǵy arnaıy jaraqtandyrylmaǵan sý aıdyndarynda shomylmaq bolǵan.

— Shomylý maýsymy bastalǵaly beri 12 adam qutqaryldy. Onyń 7-eýi Aıyrtaý aýdanynda, 3-eýi Esil aýdanynda, 2-eýi Petropavlda aman qaldy. Qutqarylǵandardyń bireýi ruqsat etilmegen jerde shomylsa, 11 adam qutqarýshylary bar demalys oryndarynda kómekke júgingen.

Byltyr jaz ýaqytynda oblystyń sý aıdyndarynda adam ólimi tirkelgen joq, — deıdi Qaırat Samaev.

Mamannyń aıtýynsha, tyıym salynǵan jerde shomylǵandarǵa 7 AEK (30 275 teńge) mólsherinde aıyppul qarastyrylǵan. Bıyl qaýipsizdik talaptaryn buzǵandarǵa 118 ákimshilik hattama toltyryldy.

Buǵan deıin Ertis ózeninde sýǵa ketken er adamnyń múrdesi alty táýlikten soń tabylǵanyn jazǵan edik.