SQO-da bıyl myńǵa jýyq jasóspirim qyzǵa APV-ǵa qarsy vaktsına egildi
PETROPAVL. KAZINFORM — Soltústik Qazaqstan oblysynda adam papıllomasy vırýsyna (APV) qarsy josparly vaktsınatsııa aıasynda 957 qyzǵa ekpe salyndy.
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, APV — adamnyń terisi men aýyz qýysyn jáne jynys músheleriniń shyryshty qabattaryn zaqymdaıtyn ózara uqsas vırýstardyń 200-den astam túri, ol keń taraǵan. Ol qol alysý, súıisý, sondaı-aq teridegi zaqymdanýlar arqyly, jynystyq jolmen, sondaı-aq anadan balaǵa bosaný kezinde juǵýy múmkin. Keıbir onkogendi túrleri uzaq ýaqyt aǵzada saqtalyp, jatyr moıny obyrynyń damýyna ákeledi. Vırýs ylǵaldy ortada tez taralatyndyqtan, saýna, monsha, sportzal, dárethana, basseın sııaqty qoǵamdyq oryndarǵa barǵan kezde saqtyq sharalaryn saqtaý qajet.
— Qazaqstanda jatyr moıny obyry áıelder arasyndaǵy onkologııalyq aýrýlar ishinde sút bezi obyrynan keıin ekinshi orynda tur. Qazirgi tańda APV-ny tolyq joıatyn emdeý tásili joq, sondyqtan aldyn alýdyń jalǵyz tıimdi ádisi — vaktsınatsııa, — deıdi Áset Jumataev.
Búginde Qazaqstanda Dúnıejúzilik densaýlyq saqtaý uıymy maquldaǵan 4-valentti «Gardasıl» vaktsınasy qoldanylady. Vaktsına ıyqqa bulshyqet ishine egiledi.
2026 jyldyń basynan beri oblysta 11–13 jas aralyǵyndaǵy qyzdarǵa ekpe salynyp keledi. Bıyl 503 qyz birinshi dozany, 454 qyz ekinshi dozany alǵan. Egilgender arasynda eshqandaı qolaısyz jaǵdaı tirkelmegen.
Mamannyń aıtýynsha, Qazaqstan Respýblıkasynyń Bas memlekettik sanıtarııalyq dárigeriniń qaýlysyna sáıkes, endi 14-17 jas aralyǵyndaǵy qyzdarǵa da qosymsha vaktsınatsııa júrgiziledi. Bul vaktsına úsh kezeńmen: alǵashqysy doza tańdalǵan kúni, ekinshisi — eki aıdan keıin, úshinshisi — alty aıdan soń egiledi.
Vaktsınatsııa mektepterdiń medıtsınalyq kabınetterinde jáne emhanalarda ata-ananyń kelisimimen tegin júrgiziledi.
— APV-ǵa qarsy vaktsına áıelderdiń reprodýktıvti densaýlyǵyna áser etpeıdi jáne bedeýlikke ákelmeıdi. Bul halyqaralyq zertteýlermen dáleldengen. Qyzdaryńyzdy APV-ǵa qarsy vaktsınatsııalaý arqyly sizder olardyń bolashaq densaýlyǵyn qorǵaýǵa úles qosasyzdar, — deıdi Áset Jumataev.
Buǵan deıin QR Densaýlyq saqtaý mınıstrligi adam papıllomasy vırýsyna (APV) qarsy vaktsınatsııalaýǵa jatatyn qyzdardyń jas sanatyn keńeıtkenin jazǵan edik.
