SQO-da bıyl memlekettik qyzmettiń sapasyna qatysty 30-ǵa jýyq turǵyn aryzdandy

PETROPAVL. KAZINFORM – Soltústik Qazaqstan oblysynda mamandar memlekettik qyzmet alý barysynda quqyǵyńyz buzylsa, qaıda júginýge bolatynyn aıtyp berdi.

QR Memlekettik qyzmet isteri agenttiginiń SQO boıynsha departamenti basqarmasynyń bas mamany Anar Battalbektiń aıtýynsha, bıyl turǵyndardan 26 ótinish túsken. 

- Olardyń ishinen 13 ótinish ıesiniń ýáji rastaldy jáne barlyq jaǵdaıda azamattardyń quqyqtary tolyq qalpyna keltirildi.

Ótinishterdiń 12-si «EgovKzBot2.0» Telegram-boty arqyly kelip túsken. Sonyń ishinde 10 ótinish boıynsha quqyq buzýshylyq rastalyp, tıisti sharalar qabyldandy, - deıdi Anar Battalbek. 

Shilde aıynda Petropavl turǵyny «Memlekettik turǵyn úı qorynan turǵyn úılerdi jekeshelendirý» qyzmetin alý kezinde kedergilerge tap bolyp, Departamentke júgingen. Mamannyń aıtýynsha, q aǵıdalarǵa sáıkes, bul qyzmet 30 kúntizbelik kún ishinde kórsetilýi tıis.

Alaıda, qala ákimdiginiń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi ótinimdi belgilengen merzimde qaramaǵan.

Jospardan tys tekserý nátıjesinde Departament turǵyn úı komıssııasynyń otyrysyn ótkizýde bastamashy bolyp, azamattyń zańdy múddesin qorǵap shyqty.

- Eger azamat memlekettik qyzmetti alý barysynda quqyqtarynyń buzylǵanyn anyqtasa, eń bastysy ýaqtyly habarlasý qajet. Bul máseleni tez ári tıimdi sheshýge múmkindik beredi, - deıdi Anar Battalbek.

Buǵan deıin SQO-da jarty jylda memlekettik qyzmet zańnamasyn buzýdyń 500-ge jýyq faktisi anyqtalǵanyn jazǵan edik.