SQO-da bıyl memlekettik ákimshilik qyzmetshilerge 450-den astam tártiptik jaza qoldanylǵan

PETROPAVL. KAZINFORM – Soltústik Qazaqstan oblysynda bıylǵy toǵyz aıda ádep jónindegi keńes qaraǵan isterdiń 64% zańbuzýshylyqtardyń aldyn alýǵa baǵyttalsa, qalǵany tártiptik istermen baılanysty.

QR Memlekettik qyzmet isteri agenttigi SQO boıynsha departamenttiń basshysy, ádep jónindegi keńes tóraǵasy Erjan Qarymsaqovtyń aıtýynsha, ádep jónindegi keńestiń búginde tártiptik isterdi qaraýdan bólek fýnktsııasy kóbeıgen. Profılaktıka basty nazarda.

- Keńestiń negizgi mindeti - sybaılas jemqorlyqtyń jáne qyzmettik ádep normalaryn buzýdyń aldyn alý úshin sharalar ázirleý, memlekettik qyzmetshilerdiń jaýapkershilik deńgeıin arttyrý. 
ıAǵnı tek jazalaýshy organ ǵana emes, sonymen qatar memlekettik qyzmette kásibı, ádepti ortany qalyptastyrý quraly bolyp otyr, - deıdi Erjan Qarymsaqov. 

Departament basshysynyń aıtýynsha, kópshilik áli kúnge memlekettik qyzmette isteıtinder túnniń bir ýaǵyna deıin jumysta otyrýǵa májbúr dep esepteıdi. 

- Memlekettik qyzmet isteri agenttigi men onyń aýmaqtyq bólimshelerine 2023 jylǵy mamyrdan bastap memlekettik organdarda jumys ýaqyty rejıminiń saqtalýyna monıtorıng júrgizý ókilettikter berildi. 

Sonymen qatar, ótken jyldan bastap memlekettik qyzmet isteri jónindegi ýákiletti organǵa memlekettik qyzmetshilermen qarym-qatynasta jumys berýshi jasaǵan quqyq buzýshylyqtardy qaraý fýnktsııasy berildi. 

Endi Departament qyzmetkerlerdiń jumys ýaqytynyń normasyn zańsyz asyrǵany úshin memlekettik organdardyń basshylaryna qatysty ákimshilik sharalardy qoldanýǵa quqyly, - deıdi Erjan Qarymsaqov.

Jyl basynan beri departament jumys ýaqyty rejıminiń saqtalýyna qatysty 13 ret monıtorıng júrgizgen. Mamandar memlekettik organdarǵa tikeleı baryp nemese jumys ýaqytyn esepke alýdy baqylaý júıeleriniń derekterin paıdalana otyryp qashyqtyqtan teksergen. 
Nátıjesinde artyq jumys istegen 36 memlekettik qyzmetshi anyqtaldy, 30 qyzmetkerge demalys saǵattary berildi, al 6 qyzmetkerge tıisti tólem júrgizildi.

- Memlekettik qyzmetshilerdiń artyq jumys isteý máselesin sheshý tek memlekettik organdar tarapynan ǵana emes, qyzmetkerlerdiń de belsendi qatysýyn talap etedi. Memlekettik qyzmetshilerdiń óz quqyqtary týraly bilýi jáne olardy belsendi qorǵaýy mańyzdy, - deıdi departament basshysy. 

Budan bólek bıylǵy 9 aıda oblystyń memlekettik ákimshilik qyzmetshilerine 458 tártiptik jaza qoldanylǵan. Onyń 356-sy jergilikti atqarýshy organdarǵa, qalǵany aýmaqtyq memlekettik organdarǵa qatysty. 

- Tártiptik jaza qoldaný rásimi Qazaqstan Respýblıkasy Prezıdentiniń 2015 jylǵy 29 jeltoqsandaǵy № 152 Jarlyǵymen bekitilgen jáne memlekettik qyzmetshilerge tártiptik jaza qoldaný qaǵıdalarymen reglamenttelgen. 

Zertteý jáne taldaý materıaldary retinde toqsan saıyn memlekettik organdar usynatyn esepter qoldanylady. 

Memlekettik qyzmetshilerge qatysty eń jıi kezdesetin zań buzýshylyqtarǵa toqtalsaq, olarǵa tártiptik jaza qoldaný merzimderin buzý jáne qyzmettik tergeý rásimin júrgizbeý jatady.

Bıylǵy 9 aıdyń qorytyndysy boıynsha departament tártiptik jaza qoldaný týraly 15 aktiniń kúshin joıdy.

Tártiptik jazany zańsyz qoldaný memlekettik qyzmetshiniń quqyǵyn buzady, saldarynan ol tártiptik jazanyń qoldanylý kezeńinde kótermeleýden aıyrylady, - deıdi Erjan Qarymsaqov. 

Mamannyń aıtýynsha, tártiptik jaýapkershilikke tartý kezinde memlekettik qyzmetshilerdiń quqyǵyn buzý faktisi sa, departament ony qalpyna keltirý úshin barlyq sharalardy qabyldaıdy.

Buǵan deıin SQO-da «Serpin» memlekettik baǵdarlamasymen joǵary bilim alǵan 1,4 myńǵa jýyq túlektiń 48% ǵana soltústik óńirde turaqtap qalǵanyn jazǵan edik.