SQO-da bıyl mektepter jabyla ma
PETROPAVL. KAZINFORM – Soltústik Qazaqstan oblysynda balanyń azdyǵynan byltyr jeti mektep jabylyp qalsa, bıyl bilim ordalarynyń sany ózgergen joq.
SQO bilim basqarmasy Kazinform agenttiginiń resmı saýalyna jaýap berip, jańa oqý jyly qarsańynda óńirdegi mektepter jelisiniń qazirgi jaǵdaıynan habardar etti.
Vedomstvonyń málimetinshe, bıyl qyrkúıekte oblys boıynsha 439 mektep oqýshylardy qabyldaıdy. Bıyl birde-bir mektep jabylǵan joq jáne mártebesi de ózgermegen. Degenmen olardyń 325-i - shaǵyn jınaqty mektep. Bul aýyldardaǵy bilim ordalarynyń bolashaǵy máselesin áli de ózekti etip otyr.
- Óńirdegi mektepterdiń 34-i - bastaýysh, 97-si - negizgi orta, 308-i - jalpy orta mektep.
Mektepterdi jabý máselesi oqýshy sanyna tikeleı baılanysty. Qoldanystaǵy normatıvke sáıkes, kontıngenti 5 baladan kem mektepter jabylýy tıis. ıAǵnı oqýshy sany belgilengen mejege jetpegen jaǵdaıda bilim berý uıymynyń jumysyn jalǵastyrý nemese qaıta uıymdastyrý máselesi qaralady.
Aldaǵy 2-3 jylda jabylýy nemese ońtaılandyrylýy múmkin mektepterdiń sany da ázirge naqtylanbaǵan. Mundaı sheshim tıisti kontıngent bolmaǵan jaǵdaıda ǵana qarastyrylady, - deıdi SQO bilim basqarmasy basshysynyń orynbasary Tatıana Protopopova.
Mamandardyń aıtýynsha, aýyl mektepterin saqtap qalýmen qatar, ondaǵy bilim sapasyn arttyrýǵa da basymdyq berilip otyr. Osy maqsatta óńirdegi barlyq shaǵyn jınaqty mektep «Aýyl mektebi - sapa alańy» respýblıkalyq jobasyna qatysyp jatyr. Joba aýyl muǵalimderiniń kásibı biliktiligin arttyrýǵa, sondaı-aq qala men aýyl mektepteri arasyndaǵy bilim sapasyndaǵy alshaqtyqty azaıtýǵa baǵyttalǵan.
Óńirde mektepterdiń sany qysqarmaǵanymen, keıbiri talapqa saı kelmeıdi. Máselen Qyzyljar aýdanyndaǵy Beloe orta mektebiniń ǵımaraty apatty dep tanylǵan. Máseleni sheshý úshin 120 oryndyq jańa mekteptiń jobalyq-smetalyq qujattamasy ázirlenip, memlekettik saraptamanyń oń qorytyndysy alynǵan. Qazir qurylys jumystary bastaldy.
Jańa oqý jylynda 165 mektepte sabaq eki aýysymda uıymdastyrylady. Al Aqqaıyń aýdanyndaǵy №3 Smırnov orta mektebi bıyl balalardy úsh aýysymda oqytýǵa májbúr.
Buǵan deıin Astanada qaıtarylǵan aktıvter esebinen 1200 oqýshyǵa arnalǵan jańa mektep salynatyndyǵyn jazdyq.
