SQO-da bıyl qurylys salasynda 30 mln teńgege jýyq aıyppul salyndy

PETROPAVL. KAZINFORM – Soltústik Qazaqstan oblysynda bıyl sáýlet, qala qurylysy jáne qurylys salasynda 157 ákimshilik quqyqbuzýshylyq anyqtaldy.

SQO memlekettik sáýlet-qurylys baqylaý jáne lıtsenzııalaý basqarmasynyń málimetinshe, aı saıyn salynyp jatqan nysandarǵa monıtorıng júrgiziledi.

Monıtorıng qorytyndysy boıynsha sýbektige eskertýlerdi joıý týraly usynymdary bar monıtorıng aktisi beriledi. Bul kóbinese profılaktıkalyq sıpatqa ıe, onyń qorytyndysy boıynsha shara qabyldaý múmkin emes.

Al tekserýler negizinen jeke jáne zańdy tulǵalardyń ótinishteri boıynsha júzege asyrylady. Jıi kezdesetin zańbuzýshylyqtar belgili bir qujattamanyń bolmaýymen baılanysty.

- Bıyl 21 tekseris ótkizdik. Úsheýi boıynsha nusqama berildi. Sáýlet, qala qurylysy jáne qurylys qyzmeti salasyndaǵy ákimshilik zańbuzýshylyqtar boıynsha jalpy somasy 30 mln teńgege jýyq aıyppul salyndy. Búginde tekseris júrgizý barysynda birqatar qıyndyq týyndap otyr. Sebebi keıbir tekseriletin uıymdar memlekettik qyzmetkerlermen kezdesýden qashyp, tekseris týraly aktimen jáne basqa resmı qujattarmen tanysýdan bas tartady, - deıdi SQO memlekettik sáýlet-qurylys baqylaý jáne lıtsenzııalaý basqarmasy basshysynyń mindetin atqarýshy Azamat Isahmetov.

Mamannyń aıtýynsha, taǵy bir másele - tekserýler qorytyndysy boıynsha nusqama berilgennen keıin jaýap berýshi bul nusqamalarǵa QR Ákimshilik rásimdik-protsestik kodeksiniń normalaryn alǵa tartyp, shaǵymdanady. Saldarynan nusqamanyń qoldanylýy toqtatyla turady.

- Qazirgi ýaqytta baqylaýshy organdardyń ókilettikteri shektelip, kásipkerlerdi qorǵaý tetikteri kúsheıgen. Sondyqtan keıbir qurylys kompanııalary osyny paıdalanyp, zań talaptaryn buzyp jatady, - deıdi Azamat Isahmetov.

Buǵan deıin Májilis jańa Qurylys kodeksiniń jobasyn birinshi oqylymda maquldaǵanyn jazǵan edik.