SQO-da bıyl «kúmis jas» jobasy aıasynda 200-den astam adam jumysqa ornalasty
PETROPAVL. KAZINFORM – Soltústik Qazaqstan oblysynda «kúmis jas» jobasy nátıje berip jatyr. Úsh jylda jumyssyz júrgen 600-den astam adam osy baǵdarlamanyń ıgiligin kórdi.
SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, 2022 jyly Qazaqstanda alǵash ret 50 jastan asqan jumyssyzdardy jumysqa ornalastyrý úshin «Kúmis jas» jobasy iske qosyldy. Joba aıasynda azamattarǵa jumysqa ornalasýǵa járdem kórsetiledi. Máselen zeınetkerlik jasqa jaqyndaǵan adamdy jumysqa alǵan jaǵdaıda 3 jyl boıy jumys berýshige eńbekaqy mólsheriniń 60-70%, keminde 30 AEK - 110 760 teńge bıýdjetten sýbsıdııalanady.
Jobaǵa qatysý merzimi aıaqtalǵannan keıin jumys berýshi zeınetkerlik jasqa tolmaǵan adamdardy keminde 1 jyl merzimge turaqty jumys ornyna ornalastyrady. Eger zeınetkerlikke deıin keminde 2 jyldaı ýaqyt qalǵan jaǵdaıda jumys berýshi ony zeınetkerlik jasqa tolǵanǵa deıin jumyspen qamtýǵa mindetti.
«Kúmis jas» jobasy qolǵa alynǵannan beri SQO-da 50 jastan asqan 600-den astam jumyssyz azamat jumysqa ornalastyryldy. Bıyl 222 adam jumysqa alyndy, taǵy 58 turǵyndy jumysqa ornalastyrý josparlanǵan.
«Men 61 jastamyn. Bilimim boıynsha tárbıeshimin. Ár túrli mekemelerde jumys istedim, keıin qysqartýǵa iliktim. Men jumyssyz bolǵandyqtan, jumyspen qamtý organdaryna júgindim. Bul jerde birneshe jumys usyndy jáne «kúmis jas» jobasyna qatysýyma bolatyndyǵyn aıtty.
Joba aıasynda «Ábisheva» jeke kásipkerliginde qonaqúı qyzmetteriniń ákimshisi retinde jumys istep jatyrmyn. Osy jerden zeınet demalysyna shyǵamyn», - deıdi M. Jumabaev aýdanynyń turǵyny Raısa Shaımuratova.
Jobaǵa qatysý úshin jumys izdegen adamdar nemese jumys berýshiler turǵylyqty jeri boıynsha Mansap ortalyǵyna júgine alady nemese «Elektrondyq eńbek bırjasy» portaly arqyly ózdiginen ótinim bere alady.
Buǵan deıin Shymkentte belsendi jastardyń Qarttar úıiniń aýlasyn qoqystan tazartqanyn aıtqan edik.
