SQO-da bıyl qumar oıynǵa salynǵan úsh memqyzmetshi jumystan shyǵaryldy
PETROPAVL. KAZINFORM — Soltústik Qazaqstan oblysynda 2025 jyldan beri memlekettik qyzmetshilerdiń qumar oıyndar men báske qatysýyna qatysty 9 derek anyqtalǵan.
Memlekettik qyzmet isteri agenttiginiń SQO boıynsha departamentiniń málimetinshe, zań talaptaryn buzǵandardyń barlyǵy memlekettik qyzmetten bosatyldy.
— Qumar oıyndar men bás tigý qarjylyq táýekeldermen baılanysty, al olarǵa shamadan tys áýestený táýeldilikke, qarjylyq qıyndyqtarǵa, otbasylyq jáne áleýmettik qatynastardyń nasharlaýyna ákelýi múmkin. Ásirese memlekettik qyzmetshi úshin onyń salmaǵy áldeqaıda aýyr. Sebebi onyń árbir áreketi jeke basynyń bedeline ǵana emes, memlekettik organǵa degen qoǵamnyń senimine de áser etedi, — deıdi departamenttiń bas mamany Evgenıı ıAkovenko.
Memlekettik qyzmet isteri agenttiginiń SQO boıynsha departamenti memlekettik qyzmetshilerdiń qumar oıyndar men bás tigýge qatysý faktilerin anyqtap, sondaı-aq zańnamaǵa sáıkes tıisti sharalar qabyldaý boıynsha júıeli túrde jumys atqaryp keledi.
Mamandardyń aıtýynsha, byltyr memlekettik qyzmetshiler arasynda qumar oıyndar men báske qatysýdyń úsheýi — Aqjar aýdanynda, ekeýi — Taıynsha aýdanynda, bireýi Esil aýdanynda tirkelgen. Al bıyl Petropavlda taǵy 3 derek anyqtalǵan.
— QR zańnamasynda memlekettik qyzmetshiler úshin arnaıy shekteý belgilengen. «Qazaqstan Respýblıkasynyń memlekettik qyzmeti týraly» Zańǵa sáıkes memlekettik qyzmetshi laýazymǵa kirisken kúnnen bastap kúntizbelik otyz kún ishinde «eGov mobile» mobıldik qosymshasy arqyly qumar oıyndarǵa jáne (nemese) bás tigýge qatysýyna shekteý qoıýǵa mindetti.
Sondyqtan qyzmettik tártip pen kásibı ádep normalaryn saqtaý — onyń basty mindetteriniń biri, — deıdi Evgenıı ıAkovenko.
Buǵan deıin qumar oıynǵa salynǵan atyraýlyq áskerı qyzmetshi kórshisin aldaǵany úshin sottalǵanyn jazǵan edik.
