SQO-da bıyl kolledjdiń úsh oqýshysy esirtki satqany úshin sottaldy
PETROPAVL. KAZINFORM — Soltústik Qazaqstan oblysynda «Jasóspirim» respýblıkalyq jedel-profılaktıkalyq is-sharasy aıasynda jastarǵa «Esirtki jasyrýshylar. Jaza» derekti fılmi kórsetilip jatyr.
Bul esirtki jaıynda SQO polıtsııa departamentiniń bastamasymen túsirilip, jaryqqa shyqqan úshinshi fılm. Esirtki tasymaldaǵany úshin jazasyn ótep jatqandardyń oqıǵalaryna negizdelip túsirilgen.
SQO polıtsııa departamenti baspasóz qyzmetiniń málimetinshe, jyl basynan óńirde kolledjdiń 3 stýdentine esirtki satqany úshin jaza kesildi. Esirtki satýshylar kóbinese ınternet arqyly jastardy aldap-arbap, kóp aqsha men qaýipsizdikti ýáde etedi. Alaıda tájirıbe kórsetkendeı, býyp-túıýshiler men esirtki jasyrýshylar orta eseppen úsh aıdan artyq jumys istemeıdi.
Tártip saqshylary jyl basynan oblysta 106 esirtki qylmysyn, onyń ishinde 39 esirtki ótkizý faktisin ashty. Zańsyz aınalymnan 27 kg astam esirtki, onyń ishinde 2,5 kg astam sıntetıkalyq esirtki alyndy. Kókshetaý men Astana qalalarynan «sıntetıkany» jetkizýdiń 3 turaqty arnasynyń joly kesildi.
— Tabysty zańdy túrde tabýdyń kóptegen joly bar. Al esirtki bıznesimen aınalysý bolashaqqa balta shabýmen birdeı. Keminde jeti jyl ómirińiz temir tordyń arǵy jaǵynda ótedi. Jańa zańnama boıynsha iri kólemde esirtki taratýshylar úshin osyndaı eń tómengi jaza kózdelgen. Al esirtki saýdasyn uıymdastyrýshylar úshin 15 jyldan bastap ómir boıyna deıin bas bostandyǵynan aıyrý jazasy bar, — dedi kolledj oqýshylarymen kezdesken polıtseıler.
Buǵan deıin Qazaqstanda 23 jasóspirim esirtki qylmysy úshin ustalǵanyn jazǵan edik.