SQO-da bıyl kólik júrgizýge quqyǵy joq 335 adam jaýapkershilikke tartyldy

PETROPAVL. KAZINFORM — Soltústik Qazaqstan oblysynda 10 aı ishinde 462 jol-kólik oqıǵasy tirkelse, sonyń 443-i júrgizýshilerdiń kinásinen bolǵan.

SQO-da bıyl kólik júrgizýge quqyǵy joq 335 adam jaýapkershilikke tartyldy
Foto: SQO PD

SQO Polıtsııa departamenti baspasóz qyzmetiniń málimetinshe, Petropavlda ótken reıd barysynda polıtseıler jeńil avtokólikti toqtatqan. 51 jastaǵy qala turǵynynyń qujattaryn tekserý kezinde onyń kólik basqarý quqyǵynan aıyrylǵany anyqtaldy.

Ol osydan eki apta buryn mas kúıinde kólik júrgizgeni úshin jeti jylǵa júrgizýshi kýáliginen aıyrylǵan. Sondaı-aq 15 táýlikke ákimshilik qamaýǵa alynǵan. 

Alaıda jazasyn ótep, qamaýdan bosap shyqqan júrgizýshi tıisti qorytyndy jasamaǵan. Bostandyqqa shyqqan kúni-aq qaıtadan kólik tizginine otyrǵan. 

Bul joly quqyq buzýshyǵa aıyppul salyndy. Qazaqstan Respýblıkasynyń Ákimshilik quqyq buzýshylyq týraly kodeksine sáıkes, kólik quralyn basqarý quqyǵy joq adam kólik júrgizgen jaǵdaıda 50 AEK, ıaǵnı 216 myń teńge mólsherinde aıyppul nemese 10 táýlikke deıin ákimshilik qamaqqa alý jazasy qarastyrylǵan.

Polıtseıler kólik júrgizý quqyǵynan aıyrylǵan adamnyń rýlge qaıta otyrýy tek zań buzýshylyq qana emes, jol qozǵalysyna qatysýshylardyń ómiri men qaýipsizdigine tónetin qater ekenin eskertedi.

SQO-da joldarynda bıyl 37 adam mert bolyp, 621 adam túrli dene jaraqatyn alǵan. Jol-kólik oqıǵalarynyń basym bóligi júrgizýshilerdiń kinásinen bolǵan. 

Jol qaýipsizdigin qamtamasyz etý maqsatynda polıtsııa qyzmetkerleri kólik basqarý quqyǵynan aıyrylǵan júrgizýshilerdi anyqtaý jumystaryn turaqty túrde júrgizip keledi. Jyl basynan beri Soltústik Qazaqstan oblysynda kólik júrgizý quqyǵynan aıyrylǵanyna qaramastan, rólge otyrǵan 335 adam ustalǵan.

Buǵan deıin Almatyda órt sóndirý kóligi jol apatyna ushyrap, bir adam mert bolǵanyn jazǵan edik.