SQO-da bıyl kásip bastaǵan 100-den astam jas 1,4 mln teńgeden grant aldy
Soltústik Qazaqstan oblysynda kásipkerlikti damytýǵa negizdelgen ulttyq joba aıasynda bıyl 273 adamǵa qaıtarymsyz grant berildi. Qoldaý kórgenderdiń 101-i – jastar, dep habarlaıdy Kazinform.
SQO jumyspen qamtýdy úılestirý jáne áleýmettik baǵdarlamalar basqarmasy oblystyq qoǵamdyq keńeste atqarylǵan jumysqa esep berdi.
Vedomstvo basshysynyń orynbasary Serik Toqymbetovtyń aıtýynsha, óz isin ashqysy keletinder úshin ótken jyldan bastap kásipkerlik negizderin oqytatyn «Bastaý bıznes» onlaın rejımde ótkizilip keledi. Jyl basynan beri 1234 adam oqyp shyqqan.
«Jańa bıznes-ıdeıalardy iske asyrýǵa áleýmettik osal topqa jatatyndarǵa, 101 jasqa barlyǵy 273 óteýsiz grant berildi. Grant mólsheri 1,4 mln teńge. Sonyń 150-i — aýyl sharýashylyǵy salasyn damytýǵa, qyzmet kórsetý salasyna — 89 jáne óndiris salasyna — 34 grant berildi», — dedi Serik Toqymbetov.
Prezıdenttiń jastar kásipkerligin damytý jónindegi tapsyrmasyn oryndaý maqsatynda bıyl jyldyq mólsherlemesi 2,5% jeńildikpen shaǵyn nesıelendirý tetigi iske qosylǵan.
Mamannyń aıtýynsha, ony 35 jasqa deıingi jastar ala alady. Tek jumys isteıtinderdiń kásibi 5 jyldan az tirkeýde bolýy tıis.
Kredıt 5 jyldan 7 jylǵa deıin beriledi, kredıttik demalys kredıt merziminiń 1/3 bóligin quraıdy.
«Jyl basynan beri 650 mln teńgege 150 shaǵyn nesıe berildi. Sonyń ishinde aýyl sharýashylyǵy salasyn damytýǵa 90 ótinim túsip, olarǵa 394 mln teńgege, 54 ótinim qyzmet kórsetý salasy boıynsha qaralyp, olarǵa 228,8 mln teńgege nesıe jáne 6 ótinim boıynsha óndiris salasyna 27,2 mln teńge berildi», — deıdi Serik Toqymbetov.
Sondaı-aq, SQO-da zeınetkerlik jasqa jaqyndap, jumys taba almaı júrgenderdi qoldaýǵa jáne olardyń tájirıbesin jas urpaqqa berýge arnalǵan «Kúmis jas» jobasy da jalǵasyp jatyr.
«Bul baǵdarlamada birqatar ózgeris bar. Іs-sharaǵa qatysýshylardyń jalaqysy 25 AEK-ten 30 AEK-ke deıin arttyryldy, qazir 103 500 teńgeni quraıdy, „Urpaqtar kelisimsharty“, „Birinshi jumys orny“ boıynsha da qazir eńbekaqy osyndaı. Úmitkerlerdiń qatysý merzimi 1 jyldan 3 jylǵa deıin, sýbsıdııalar mólsheri ulǵaıtyldy jáne „Kúmis jas“ jobasy boıynsha endi 50 jastan joǵarylar qatysa alady», — deıdi basqarma basshysynyń orynbasary.
