SQO-da bıyl qarasha aıynda rekordtyq temperatýralyq kórsetkishter jańartyldy
PETROPAVL. KAZINFORM — Kúzdiń sońǵy aıy bolsa da Soltústik Qazaqstan oblysynda bıyl jyly aýa raıy saqtalyp tur.
«Qazgıdromet» kásiporny SQO fılıalynyń málimetinshe, búgin, máselen Petropavlda synap baǵanasy +3 °S-qa deıin kóterilmek. Erteń, 21 qarasha kúni aýa raıy azdap sýytyp, shamamen -2 °S bolǵanymen, kelesi kúni taǵy da kún jylynyp, temperatýra +2 °S kórsetpek.
— SQO-da bıyl qarasha aıy jyly jáne klımattyq norma shegindegi jaýyn-shashyndy boldy. Aımaqta keı kúnderi burynǵy jyldardyń rekordtyq temperatýralyq kórsetkishteri jańartyldy. Mysaly Petropavldaǵy meteostantsııada 15 qarashada aýa temperatýrasy +8,7 °S-ty, al 16 qarashada +9,0 °S-ty kórsetti. Bul sońǵy jyldardaǵy eń joǵary kórsetkishterdiń biri.
20 qarashadaǵy jaǵdaı boıynsha Petropavlda ortasha aýa temperatýrasy -0,5 °S boldy. Bul kórsetkish klımattyq normadan 4,3 °S-qa joǵary. Oblys boıynsha ortasha temperatýra -0,9…-1,6 °S aralyǵynda tirkelip, kópjyldyq normadan 3,6–4,3 °S-qa joǵary boldy, — deıdi oblystyq fılıaldyń dırektory Qymbat Merǵalımova.
Mamandardyń aıtýynsha, aı ishinde oblys aýmaǵynda jaýyn-shashyn jıi jaýdy. Sonymen qatar kóptegen aýdanda tuman, kóktaıǵaq boldy.
Jaýyn-shashyn mólsheri óńir boıynsha 17 mm-den 62 mm-ge deıin ózgerdi. Bul keı jerlerde normadan 1,5–2 ese kóp. Eń kóp jaýyn-shashyn Ǵabıt Músrepov atyndaǵy aýdannyń Vozvyshenka aýylynda tirkeldi. Norma 30 mm bolsa, munda 62 mm jaýǵan. Petropavlda jaýyn-shashyn mólsheri 26 mm boldy, bul aılyq normanyń 88%.
Aldyn ala boljam boıynsha, bıylǵy qys oblysta jyly bolady. Jaýyn-shashyn mólsheri de kópjyldyq normadan aspaıdy. Degenmen, sınoptıkterdiń aıtýynsha, qys mezgili qarly boran, qatty jel, kóktaıǵaq, tuman jáne jaýyn-shashynsyz ótpeıdi.
Jalpy SQO-da qarashadaǵy eń jyly kún 1984 jyly Petropavlda tirkelgen eken. Sol kúni aýa temperatýrasy +21 °S bolǵan.
Al eń tómengi kórsetkish 1998 jyly Sergeevkada baıqaldy. Synap baǵanasy — 40 °S kórsetti.
Buǵan deıin 20 qarashada elimizdiń birqatar óńirinde aýa raıyna baılanysty daýyldy eskertý jarııalanǵanyn jazǵan edik.