SQO-da bıyl qar bıiktigi de, ylǵal mólsheri de byltyrǵydan tómen

PETROPAVL. KAZINFORM – Soltústik Qazaqstan oblysynda sınoptıkter qar qalyńdyǵyn, ondaǵy sý mólsherin jáne jer qyrtysynyń qatý deńgeıin eseptedi. 

«Qazgıdromet» RMK SQO fılıaly usynǵan málimetke sáıkes, bıyl Shal aqyn, Qyzyljar, M.Jumabaev jáne Ǵ.Músirepov atyndaǵy aýdandarda qar qalyń jaýǵan, mundaǵy meteostantsııa ornalasqan aýmaqta qar bıiktigi 40 sm-ge deıin jetedi. Byltyr osy ýaqytta qar qalyńdyǵy M.Jumabaev aýdanynda - 47 sm, Qyzyljar, Esil aýdandarynda 44-45 sm bolǵan. Bul kópjylǵy kórsetkishten joǵary, norma - 28 sm. 

Bıyl qar jamylǵysyndaǵy ylǵal da kópjyldyq kórsetkishten keı jerlerde shamamen eki ese joǵary. Máselen, Shal aqyn aýdanynda bıyl qardaǵy sý mólsheri 96 mm bolsa, norma - 54 mm. Desek te, Jambyl, Mamlıýt aýdandarynda qardyń sýmen qanyǵýy jyldaǵydan 8-10 mm tómen. Byltyr Esil aýdanynda qar jamylǵysyndaǵy sýdyń mólsheri 128 mm, M.Jumabaev aýdanynda 136 mm-ge deıin jetken.

Al Shal aqyn aýdanynda sınoptıkter 106 mm-di tirkegen. 

Mamandar 2024 jyldyń 4 qarashasy men 2025 jyldyń 30 qańtary aralyǵyndaǵy jaýyn-shashyn mólsherin eseptedi. Bıyl Mamlıýt aýdanynda 108 mm qar jaýǵan, kópjylǵy kórsetkish – 67 mm. Aıyrtaý aýdanynda 107 mm bolsa, norma - 84 mm. Degenmen, bul byltyrǵymen salystyrǵanda anaǵurlym tómen. Máselen Aıyrtaý aýdanynda qysqy jaýyn-shashyn mólsheri -152 mm, al Ǵ.Músirepov atyndaǵy aýdanda kópjyldyq kórsetkish 56 mm bolsa, byltyr 187 mm, Qyzyljar aýdanynda 59 mm normada 171 mm bolǵan. 

Bıyl óńirde qys jyly, sondyqtan jer qabaty tereńge qatpaǵan. Ǵ.Músirepov atyndaǵy aýdanda 15 sm-ge ǵana, M.Jumabaev aýdanynda 18 sm-ge qatqan. Byltyr Ýálıhanov aýdanynda topyraq 1,5 metrge qatsa, bıyl kórsetkish shamamen eki ese tómen – 81 sm. Aqjarda – 65 sm, M.Jumabaev aýdanynda 77 sm, Taıynshada 78 sm qatqan. Bul byltyrǵydan eki ese az. 

Buǵan deıin SQO-da tasqynnan zardap shekkenderge úı salǵan kompanııalarǵa 400 mln teńge tólenbegenin jazǵan edik.