SQO-da bıyl ekologııa zańnamasyn buzǵandarǵa 21 mln teńgeden astam aıyppul salyndy
PETROPAVL. KAZINFORM — Soltústik Qazaqstan oblysynyń ekologııa departamenti bıyl 216 tekserý júrgizip, nátıjesinde 131 zań buzýshylyq anyqtady. Jaýapty tulǵalarǵa ákimshilik sharalar qabyldandy.
Departament málimetinshe, memlekettik ekologııalyq baqylaýdyń negizgi maqsaty — tabıǵat qorǵaý zańnamasynyń saqtalýyn qamtamasyz etý, qorshaǵan ortaǵa keltiriletin zııannyń aldyn alý jáne óńirdegi ekologııalyq qaýipsizdikti kúsheıtý.
Bıylǵy tekserýlerdiń 14-i nysanǵa barý arqyly profılaktıkalyq baqylaý bolsa, 182-si kásipkerlik sýbektisine barmaı júrgizilgen.
Sonymen qatar jeke jáne zańdy tulǵalardyń ótinishteri negizinde jospardan tys 8 tekserý uıymdastyrylyp, 12 sýbektiniń biliktilik talaptaryna sáıkestigi tekserildi.
Nátıjesinde anyqtalǵan zań buzýshylyqtardy joıý úshin 90 nusqama berilip, onyń 83% oryndalǵan.
Jyl basynan beri quqyq buzýshylyqtarǵa baılanysty jalpy somasy 13,6 mln teńgeden asatyn 32 ákimshilik aıyppul salyndy. Sondaı-aq 24 eskertý shyǵarylyp, 6 materıal sotqa jiberildi.
Sot sheshimimen bes ákimshilik is boıynsha jalpy somasy 7,4 mln teńge mólsherinde aıyppul salyndy. Bir ákimshilik isti qaraý ýaqytsha toqtatylǵan.
Quqyq buzýshylar ákimshilik aıyppuldy óz erikterimen tólep, bıýdjetke 13,3 mln teńgeden astam qarajat tústi. Mamandardyń aıtýynsha, qazirgi ýaqytta tek bir is boıynsha ǵana 60 myń teńgege jýyq aıyppul májbúrlep óndirý satysynda tur.
Sondaı-aq departament sharýashylyq qyzmetin toqtatý máselesi boıynsha bir materıaldy sotqa joldady.
Buǵan deıin Batys Qazaqstanda ekologııa salasynda 115 zań buzýshylyq anyqtalǵanyn jazǵan edik.
