SQO-da bıyl drondardyń kómegimen 300-ge jýyq zań buzý deregi anyqtaldy
PETROPAVL. KAZINFORM — Soltústik Qazaqstan oblysynda tártip saqshylary 30-ǵa jýyq drondy kúrdeli ýchaskelerde jol jaǵdaıyn áýeden baqylaýǵa jáne óńirdegi qoǵamdyq tártipti tıimdi qamtamasyz etýge qoldanady.
SQO Polıtsııa departamenti baspasóz qyzmetiniń málimetinshe, Petropavl mańynda dronnyń kómegimen qaýipsizdik beldigin taqpaı kólik júrgizgen 59 jastaǵy «KamAZ» júrgizýshisi anyqtaldy. Oǵan 5 AEK (21 625 teńge) mólsherinde aıyppul salyndy.
Ushqyshsyz ushý apparattary polıtseılerge jol qozǵalysyn áýeden, keıbir júrgizýshiler statsıonarlyq beınebaqylaý kameralary joq jerde tártip saqshylary baıqamaıdy dep oılaıtyn ýchaskelerde zańbuzýshylyqtardy anyqtaýǵa múmkindik beredi.
— Tsıfrlandyrý jáne jasandy ıntellekt jyly SQO Polıtsııa departamenti ushqyshsyz avıatsııalyq júıelerdi qoldaný aıasyn edáýir keńeıtti. Olar kóbine jol qozǵalysy erejeleriniń buzylýyn anyqtaý úshin paıdalanylady. Jyl basynan beri osyndaı 286 derek tirkeldi. Budan bólek, drondar habar-osharsyz ketken adamdar men joǵalǵan maldy izdeýge, qoǵamdyq oryndarda quqyq buzýshylyqtardyń aldyn alýǵa qoldanylady, — deıdi polıtsııa ókilderi.
Drondardy arnaıy daıarlyqtan ótken polıtsııa qyzmetkerleri basqarady.
Buǵan deıin ortasha jyldamdyqty baqylaý júıesi bar avtojoldardyń sany artqanyn jazǵan edik.
