SQO-da bıyl dala órti byltyrǵydan 29 ese kóp tirkeldi

PETROPAVL. KAZINFORM — Soltústik Qazaqstan oblysynda órt qaýipti kezeń bastalǵaly beri 29 dala órti tirkelip, 283 gektar jer janyp ketti. Byltyr dál osy kezeńde 4 ga-da bir ǵana órt shyqty.

Bul týraly óńirlik kommýnıkatsııalar qyzmetinde SQO tótenshe jaǵdaılar departamenti bastyǵynyń orynbasary Dmıtrıı Rastıhın habardar etti.

Kún jylynǵaly Taıynsha aýdanynda — 9, Ǵ. Músirepov atyndaǵy aýdanda — 7, Aqjar jáne M. Jumabaev aýdandarynda — 4 órtten tirkelgen. Sonymen qatar, qurǵaq shóptiń janýdyń 160-tan astam faktisi tirkelip, 410 gektarǵa jýyq aýmaq otqa orandy.

— Órt qaýipsizdigin qamtamasyz etý maqsatynda oblys boıynsha 356 adam bar 55 mobıldi top quryldy, 418 reıd júrgizilip, 78 adam ákimshilik jaýapkershilikke tartyldy, 66 — eskertý jasalsa, jalpy somasy 380 myń teńge bolatyn 12 — aıyppul salyndy, — deıdi Dmıtrıı Rastıhın.

Mamannyń aıtýynsha, aldyn alý jumysy tıisti deńgeıde atqarylmaǵan. Órttiń taralýyn tejeý úshin aýyldardyń aınalasynda 1588,3 km qorǵanys jolaǵy salynýy tıis bolsa, búginde tek 808,3 km jasalǵan. Máselen Qyzyljar aýdany 217 shaqyrymnyń tek 25-in ǵana jyrtqan.

— Jaýapty organdar profılaktıkalyq jumystardy kúsheıtkenimen, birqatar aýdandarda qaýipsizdik sharalary jetkiliksiz. Oblys boıynsha 538 eldi meken bar bolsa, sonyń 277-sinde ǵana shóp pen qoqystan tazartý jumysy atqarylǵan. Oblys ortalyǵynda bul jumys júrgizilmegen, — deıdi Dmıtrıı Rastıhın.

Buǵan deıin SQO-da qutqarýshylar shomylýǵa qaýipti sý qoımalaryn ataǵan edi.