SQO-da bıyl alıment tóleýden jaltarǵan 10 boryshker qylmystyq jaýapqa tartyldy

PETROPAVL. KAZINFORM — Soltústik Qazaqstan oblysynda alıment boıynsha qaryz 260 mln teńgeden asty. 

Óńirde alıment óndirip alý máselesi ózekti. Ákimshilik qana emes qylmystyq jaýapkershilik qarastyrylǵanymen, boryshkerler balalary aldyndaǵy qaryzynan qutylýǵa asyqpaıdy.

SQO boıynsha jeke sot oryndaýshylary óńirlik palatasynyń basshysy Asan Matkárimovtyń aıtýynsha, óńirde 10 myńǵa jýyq alıment tóleıtin adam bar. Sonyń úsh myńy ǵana ýaqytynda tólem jasaıdy. Al 300-ge jýyǵy problemalyq boryshkerler qatarynda.

— Alıment mólsheri kelisimmen nemese sot tártibimen anyqtalady. Eger kelisim bolmasa, bir balaǵa jalaqynyń jáne (nemese) ózge de kiristiń ¼ bóligi; 2 balaǵa — ⅓ bóligi, 3 jáne odan kóp balaǵa — ½ bóligi mólsherinde alıment ustalady. Qazir múldem alıment tólemeı jaltaryp júrgenderdiń ortaq qaryzy 260 mln teńgege jetti, — deıdi Asan Matkárimov.

Mamannyń aıtýynsha, qazirgi ýaqytta 72 boryshker jasyrynyp júr, olar kóshi-qon polıtsııasynyń kómegimen izdestirilip jatyr. Alımentten qaryzy bar adamǵa birqatar shara qoldanylady, ıaǵnı múlki tárkilenip, satylýy múmkin. Sondaı-aq, bankttegi esepshottaryna, shetelge shyǵýyna tyıym salynady. Júrgizýshi kýáligin paıdalana almaıdy.

— Ákimshilik jaýapkershilikke tartylǵan jaǵdaıda aıyppul salynady nemese 5 táýlikke deıin qamaýǵa alynady. Al qylmystyq jaýapkershilikke tartylsa, qoǵamdyq jumystarǵa tartylady, aıyppul salynady nemese bir jylǵa deıin bas bostandyǵynan aıyrylady. Bıyl 155 adam ákimshilik, 10 boryshker qylmystyq jaýapkershilikke tartyldy, — deıdi Asan Matkárimov.

Buǵan deıin qazaqstandyq áıel nekesiz týǵan balaǵa alıment óndirip alý úshin Konstıtýtsııalyq sotqa júgingenin jazǵan edik.