SQO-da bıyl 90-nan astam memlekettik qyzmetshiniń quqyǵy qorǵaldy
PETROPAVL. KAZINFORM — Soltústik Qazaqstan oblysynda memlekettik qyzmetshilerdiń quqyǵyn qorǵaý barysynda birqatar zańbuzýshylyqtar anyqtaldy.
Memlekettik qyzmet isteri agenttiginiń SQO boıynsha departamentiniń málimetinshe, ótken jartyjyldyqta 19 tekserý júrgizilgen. Onyń ishinde 5-eýi josparly, 14-i jospardan tys bolǵan. Nátıjesinde 29 memlekettik qyzmetshiniń quqyǵy qalpyna keltirildi.
Sonymen qatar, jumys ýaqyty rejıminiń saqtalýyna monıtorıng júrgizilip, 108 memlekettik organ qamtyldy. Nátıjesinde 62 memlekettik qyzmetshiniń quqyǵy qorǵaldy.
— Eń jıi kezdesetin zańbuzýshylyqtar memlekettik qyzmetshilerdi belgilengen jumys ýaqytynan tys qyzmettik mindetterdi oryndatý, sondaı-aq tártiptik jaýapkershilikke tartý kezinde zańnamada kózdelgen rásimderdiń saqtalmaýy. Jeke tulǵanyń ótinishi negizinde júrgizilgen tekserý barysynda memlekettik qyzmetshilerdiń belgilengen jumys kestesinen tys qyzmettik mindetterdi oryndaýǵa tartylǵany anyqtaldy. Atap aıtqanda, laýazymdy tulǵa qyzmetkerlerden jumys kúni bastalǵanǵa deıin qyzmettik aqparat berýdi talap etken. Tekserý nátıjesinde bul derek rastalyp, qyzmetshilerge jumys ýaqytynan tys atqarǵan jumysy úshin demalys kúnderi berildi, — deıdi departament basshysynyń orynbasary Baqyt Mahatov.
Sondaı-aq tártiptik jaza qoldaný kezinde zań talaptarynyń buzylǵandyǵy anyqtalǵan. Osylaısha, úsh tártiptik jazanyń kúshi joıylyp, qyzmetshilerdiń quqyǵy qalpyna keltirildi.
Budan bólek, memlekettik qyzmetshilerdiń ádep normalaryn buzý faktileri boıynsha azamattardyń ótinishteri qaralyp, eki jaǵdaıda tártiptik is qozǵaldy. Ádep jónindegi keńestiń sheshimimen kináliler tártiptik jaýapkershilikke tartyldy.
Buǵan deıin BQO-da 200-ge jýyq memlekettik qyzmetshi ústeme jumysqa jańsyz tartylǵanyn jazǵan edik.
