SQO-da bıyl 700-ge jýyq nysan múgedektigi bar adamdarǵa beıimdeldi
PETROPAVL. KAZINFORM – Soltústik Qazaqstan oblysynda múgedektigi bar adamdarǵa qoljetimdi ortany qalyptastyrý maqsatynda 678 áleýmettik nysan beıimdeldi. Budan bólek Eńbek jáne áleýmettik qorǵaý komıtetiniń oblys boıynsha departamenti tekserý júrgizip, zańbuzýshylyqtardy joıýǵa 51 uıǵarym berdi.
QR Eńbek jáne halyqty áleýmettik qorǵaý mınıstrliginiń málimetinshe, elimizde múgedektigi bar adamdardyń quqyǵyn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar bar. Sondaı-aq «Amanat» partııasynyń 2023-2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy qolǵa alynǵan.
«Amanat» partııasynyń ınteraktıvti qoljetimdilik kartasyna 35 myńnan astam nysandy beıimdeý boıynsha jumys engizilgen. Jyl saıyn obektilerdiń 20% beıimdelýi tıis. Qazirgi ýaqytta el boıynsha 16 541 nysanda tıisti jumys atqaryldy.
Al, osy jyldyń sońyna deıin SQO boıynsha 634 nysandy beıimdeý josparlansa, óńirde jumys artyǵymen oryndalyp, 678 nysan múgedektigi bar adamdarǵa beıimdeldi. Onyń ishinde memlekettik uıymdar, densaýlyq saqtaý, bilim berý, mádenıet, saýda jáne qyzmet kórsetý nysandary bar.
«2024 jyldyń naýryz aıynda men departamentke «Gorızont» saýda úıi men «Kvartal» bıznes-ortalyǵy múgedektigi bar adamdar úshin qoljetimdi emestigin aıtyp, jazbasha eskertýlermen júgindim. Meniń ótinishim boıynsha departament qyzmetkerleri jospardan tys tekserý júrgizdi, nátıjesinde eskertýlerdi joıý boıynsha sharalar qabyldandy. Birinshi top múgedektigi bar azamat retinde men Petropavl, jalpy oblys boıynsha jaqsy jumys júrgizilip jatqanyn kórip otyrmyn», - deıdi «Ardos-Júrek» QB basshysy Kárim Aqjan.
Budan basqa, memlekettik baqylaý aıasynda Eńbek jáne áleýmettik qorǵaý komıtetiniń SQO boıynsha departamenti bıylǵy 8 aıda memlekettik basqarý, densaýlyq saqtaý, áleýmettik qorǵaý, mádenıet, jeke kásipkerlik jáne t. b. salalardaǵy áleýmettik ınfraqurylym nysandaryna 67 tekserý júrgizdi, onyń ishinde: 22 – jospardan tys tekserýr, 36 – profılaktıkalyq baqylaý jáne prokýratýranyń talaby boıynsha 9 tekserý.
Nátıjesinde anyqtalǵan zańbuzýshylyqtardy joıý týraly 51 uıǵarym berilip, 2 mln teńgeden astam somaǵa 7 ákimshilik aıyppul salyndy.
Buǵan deıin Petropavldy sýmen qamtý 1,5 táýlikke toqtatylatynyn jazǵan edik.
