SQO-da bıyl 670 shaqyrym jol jóndeledi
PETROPAVL. KAZINFORM – Soltústik Qazaqstan oblysynda bıyl 670 km jol jóndelmek, bul – oblystyq, aýdandyq mańyzy bar jáne aýylishilik joldar.
SQO ákimi Ǵaýez Nurmuhambetovtyń basshylyǵymen ákimdik otyrysy ótip, óńirdegi joldardy jónge keltirý máselesi qaraldy. Memleket basshysynyń normatıvti jaǵdaıdaǵy avtojoldardyń úlesin 95% jetkizý tapsyrmasyn oryndaý maqsatynda oblysta keshendi sharalar qolǵa alynǵan.
SQO ákimdiginiń málimetinshe, Elenovka-Aryqbalyq-Chıstopole-Esil tas jolyndaǵy Salqynkól aýyly mańyndaǵy kópir qurylysy júrip jatyr, Andreevka-Bostandyq, Pokrovka-Ilınka-Mektep, Dáýit-Lenıngradskoe aýyldary arasyndaǵy joldardy kúrdeli jóndeý jumystary aıaqtalýǵa jaqyn. Saýmalkól men Novoıshımskoe aýyldary arasynda da ortasha jóndeý jumystary júrgizilse, Lenıngradskoe-Alqaterek jáne Grıgorevka-Tokýshı joldaryn jóndeý aıaqtalǵan.
Sondaı-aq uzyndyǵy 95 shaqyrymdy quraıtyn 8 jańa jobany júzege asyrý bastaldy, ol: Imantaý aýylyndaǵy kópirdi kúrdeli jóndeý, Smırnovo-Qııaly, Gorkovskoe-Voshodskoe, Pokrovka-Gornoe, Qaraqoǵa-Nadejka, Meńkeser-Razdolnoe, Krıvoşekovo-Sadovka joldaryn kúrdeli jóndeý, Novomıhaılovka-Bostandyq jolyn aǵymdaǵy jóndeý jumystary.
Respýblıkalyq mańyzy bar joldardyń bıyl 385 km jónge keltirilmek. Dáýit pen Talshyq aýyldary arasyndaǵy jáne Kishkenekól aýylyna baratyn joldy kúrdeli jóndeý jumystary júrgizilip jatyr. Aqmola oblysynyń shekarasynan bastap Beskól aýylyna deıingi 7 ýchaskede Jezqazqan-Petropavl respýblıkalyq jolyn ortasha jóndeý jalǵasqan. Mamlıýtka-Qostanaı respýblıkalyq tas joly da jańartylady, munda 10 ýchaske jóndelmek.
Aımaq basshysy Ǵaýez Nurmuhambetov tıisti basqarmalar men aýdan ákimderine barlyq protsedýralardy jedeldetip, jóndeý jumystaryn der kezinde júrgizýdi, joldardy jóndeý sapasyna tıisti baqylaýdy qamtamasyz etýdi tapsyrdy.
Sondaı-aq oblys ákimi jurtshylyqty jol jóndeý jumystarynyń barysyn qadaǵalap, jiberilgen barlyq kemshilikterdi esepke alýǵa shaqyrdy.
Buǵan deıin Úkimet Nura toptyq sý qubyryn rekonstrýktsııalaýǵa rezervten 3,1 mlrd teńgeden astam qarajat bólgenin jazǵan edik.
