SQO-da bıyl 600-ge jýyq ınternet-alaıaqtyq deregi tirkeldi

PETROPAVL. KAZINFORM — Petropavl turǵyny ınternet-alaıaqtarǵa aldanyp, 5 mln teńgeden astam aqshasynan aıyryldy. 

Soltústik Qazaqstan oblystyq polıtsııa departamenti baspasóz qyzmetiniń málimetinshe, turǵynǵa WhatsApp messendjeri arqyly ózin «Egov qyzmetkeri» dep tanystyrǵan adam qońyraý shalyp, bireýlerdiń onyń jeke kabınetin buzǵanyn habarlaǵan. Derekterdi «naqtylaý» jáne bank qosymshalaryna kirýdi qalpyna keltirý syltaýymen sms-habarlama arqyly kelgen kodty aıtýyn talap etken.

Keıin jábirlenýshige ózin polıtsııa qyzmetkeri retinde tanystyrǵan adam beıneqońyraý arqyly habarlasyp, ártúrli bankterde onyń atyna nesıe alýǵa ótinimder berilgenin aıtqan. Operatsııany boldyrmaý úshin er adamǵa óz atyna dál sondaı nesıeler rásimdep, alynǵan qarajatty «qaýipsiz shotqa» aýdarý qajettigin túsindirgen. Alaıaqtardyń talaptaryn buljytpaı oryndaǵan petropavldyq 5 mln teńgeden astam qarajatynan aıyryldy.

— Atalǵan fakti boıynsha sotqa deıingi tergep-tekserý júrgizilip jatyr. Urlanǵan qarajat túsken dropperlerdiń esepshottary buǵattaldy, polıtsııa olardyń ıelerin anyqtaý ústinde. Bul jábirlenýshige keltirilgen zalaldy sot arqyly óndirip alýǵa múmkindik beredi, — deıdi polıtsııa qyzmetkerleri.

Jyl basynan beri SQO-da ınternet-alaıaqtyqtyń 563 deregi tirkeldi, olardyń 407-si nesıe rásimdeýmen baılanysty.

— Eshbir resmı tulǵa sizden qarjylyq operatsııalar jasaýdy, nesıe rásimdeýdi nemese qarajatty kórsetilgen esepshotqa aýdarýdy talap ete almaıdy. Sms arqyly kelgen kodty aıtýdy nemese aqsha aýdarýdy suraǵandardyń barlyǵy — alaıaq.

Sondaı-aq Egov portalynda nesıelerden erikti túrde bas tartý qyzmetin paıdalanǵan jón. Bul ınternet-alaıaqtyqtan qorǵanýdyń senimdi tásilderiniń bir, — deıdi tártip saqshylary.

Mamandardyń aıtýynsha, qazirgi ýaqytta SQO-da 255 myńnan astam adam, ıaǵnı SQO turǵyndarynyń shamamen 53,5% osy qyzmetti paıdalanyp, nesıe alýǵa shekteý qoıdy.

Buǵan deıin Jambyl oblysynda ınternet alaıaqtyq eki esege óskenin jazǵan edik.