SQO-da bıyl 4,5 mlrd teńgege 40 bilim berý nysany kúrdeli jóndeledi

PETROPAVL. KAZINFORM – Soltústik Qazaqstan oblysynda bilim berý ınfraqurylymyn jańǵyrtý jáne qoljetimdi etý boıynsha keshendi sharalar júrgizilip jatyr.

SQO ákimdiginiń málimetinshe, shilde aıynda Petropavldaǵy «Bereke» shaǵyn aýdanynda 600 oryndyq jańa mektep ashylady. «Jaıly mektep» baǵdarlamasy aıasynda boı kótergen nysanda: qasbetti qaptaý, edenderdi tóseý, syrtqy jáne ishki ınjenerlik jelilerdi tartý sııaqty negizgi jumys atqaryldy. Mektep sońǵy tehnıkamen jáne bilim berý standarttarymen jabdyqtalady. Munda fızıka, hımııa, bıologııa jáne ınformatıka boıynsha jańa modıfıkatsııadaǵy oqý kabınetteri, STEM-zerthana, robototehnıka synyptary, praktıkalyq sabaqtarǵa arnalǵan sheberhanalar, keń sport zaldary bolady. 

Bıyl jalpy SQO-da 4,5 mlrd teńgege 40 bilim berý nysany kúrdeli jóndeýden ótpek. Onyń ishinde 30 mektep, 2 balabaqsha jáne 4 kolledj bar.

Sonymen qatar, 1,9 mlrd teńgege 41 bilim berý nysanynda aǵymdaǵy jóndeý júrgiziledi. Onyń ishinde 3 balabaqsha, 19 mektep, 3 jazǵy lager, 13 kolledj jáne jetim balalarǵa arnalǵan 3 uıym bar. 

Budan bólek, bilim berý uıymdarynyń materıaldyq-tehnıkalyq bazasyn nyǵaıtýǵa 5,3 mlrd teńge bólingen. Bul qarajatqa ınteraktıvti panelder, kompıýterler, oqýlyqtar, jylytý qazandyqtary, mektepterge, balabaqshalarǵa, kitaphanalar men kolledjderge arnalǵan jıhaz, sporttyq qural-jabdyqtar, pándik kabınetter, sondaı-aq mektep ashanalary men kolledjderge jabdyqtar satyp alynbaqshy. 

Buǵan deıin «Jaıly mektep» ulttyq jobasyna ózgerister engizilgenin jazǵan edik.