SQO-da bıyl 4 maıdanger Jeńis kúnin qarsy alady

PETROPAVL. KAZINFORM – Soltústik Qazaqstan oblysynda Ekinshi dúnıejúzilik soǵys ardagerlerine bıyl da Jeńis kúnine oraı 1,5 mln teńgeden beriledi. 

SQO ardagerler keńesiniń tóraǵasy Eskendir Eleýsizovtiń aıtýynsha, byltyr Jeńis meıramyn 8 soǵys ardageri qarsy alsa, óńirde qazirgi ýaqytta 4 maıdanger qalǵan. Olardyń barlyǵy – Petropavl turǵyny. Valentına Volkodav 102 jasqa kelgen. Vasılıı Makıenko 98 jasta. Dmıtrıı Sergeev pen Fedor Şeglov 97 jasqa keldi.

Budan bólek ardagerlerge teńestirilgen 3,2 myńnan astam adam bar. Olar - tyl eńbekkerleri, jaý qorshaýynda bolǵan Lenıngrad turǵyndary, maıdangerlerdiń jesirleri, kontsentratsııalyq lagerlerdiń tutqyndary jáne taǵy basqalar. Jeńis kúnine oraı bul sanatqa jatatyn turǵyndarǵa 100 myń teńge men 5 AEK mólsherinde, ıaǵnı 18 460 teńge aralyǵynda birjolǵy tólem jasalady.

«Bıyl óńirdegi qazirgi jaǵdaıǵa baılanysty Jeńis meıramy eshqandaı sherýsiz, kontsertsiz atap ótiledi. 9 mamyr kúni soǵysta qaza tapqandardyń qurmetine oraı Máńgilik alaý basyna baryp gúl shoqtaryn qoıamyz.

Qazirgi ýaqytta oblysta Ekinshi dúnıejúzilik soǵys ardagerleriniń qurmetine arnalǵan 500-den astam eskertkish bar. Búginde senbilikter uıymdastyryp, solardy retke keltirip jatyrmyz, syrlaımyz, aınalasyn qoqystan tazartamyz. Aıta ketetin bir másele – kóship ketken aýyldarda qalǵan osyndaı eskertkishterdiń jaǵdaıy. Aýyldyq okrýgtermen habarlastyq, solardyń kómegimen bul eskertkishter de jónge keltiriledi», - deıdi Eskendir Eleýsizov.

Buǵan deıin Petropavlda Qazaqstan halqynyń birligi kúni erekshe formatta atap ótiletinin aıtqan edik.