SQO-da bıyl 4 adamǵa kene entsefalıti dıagnozy qoıyldy

PETROPAVL. KAZINFORM – Soltústik Qazaqstan oblysynda keıingi aptada kene shaqqan 12 adam dárigerge qaraldy. Kún sýytqanymen qansorǵyshtan keler qaýip áli de seıilgen joq. 

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, sáýirdiń birinen óńirde kene shaǵýdyń 643 jaǵdaıy tirkeldi. Onyń ishinde 14 jasqa deıingi balalardyń úlesi – 28%. Tek keıingi eki aptada 32 adam qansorǵyshtardan zardap shekti. 

«Bıyl 4 adamǵa kene entsefalıti jáne taǵy sonshasyna laım-borrelıoz dıagnozy qoıyldy. Kene entsefalıti – ortalyq nerv júıesin zaqymdaıtyn jedel ınfektsııalyq aýrý. Onyń aǵzaǵa áseri ártúrli. Keıbiri tolyq táýir bolyp ketse, endi biri bul ınfektsııadan keıin múgedek nemese qaıtys bolýy da múmkin. Aýrý ıksod kenelerdiń sorý arqyly beriledi. Borrelıoz – bul da keneler tasymaldaıtyn bakterııalyq ınfektsııa. Ony Laım borrelıozy nemese Laım aýrýy dep te ataıdy. Aýrýdyń belgileri, aýyrlyq dárejesi ártúrli bolýy múmkin jáne negizinen terige áser etedi, sondaı-aq júıke júıesine, býyndarǵa jáne júrekke de áser etýi múmkin. Borrelıozdyń alǵashqy belgileri sýyq tııý belgilerine uqsaıdy – jótel, murynnan sý aǵý, bas aýrýy, álsizdik paıda bolady. Sondyqtan kópshilik medıtsınalyq kómekke júginbeıdi. Ýaqytyly emdeý bolmaǵan jaǵdaıda Laım aýrýy mıdy, júrekti, býyndardy zaqymdaýy múmkin», - deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov. 

SQO-da Aıyrtaý aýdany endemııalyq aýdan bolyp esepteledi. Bıyl memlekettik tapsyrys boıynsha osy aýdanda sáýir-qyrkúıek aılarynda dezınsektsııalyq sharalar júrgizildi. 

«Aldyn alý úshin jylda kene entsefalıtiniń tabıǵı oshaǵynda jumys isteıtinderge vaktsınatsııa júrgiziledi. Vaktsınany turǵylyqty meken jaı boıynsha tirkelgen emhanada alýǵa bolady. Biraq ekpe almas buryn dárigerge kóriný qajet», - deıdi Arman Kúshbasov.

Buǵan deıin SQO-da 140 myń adam túrli aýrýlarmen dıspanserlik esepte turǵanyn jazǵan edik.