SQO-da bıyl 30-ǵa jýyq esirtki jetkizý arnasy joıyldy
PETROPAVL. KAZINFORM — Petropavlda asa iri mólsherde esirtki ótkizdi degen kúdikpen Jambyl oblysynyń 42 jastaǵy turǵyny ustaldy.
Soltústik Qazaqstan oblysy Polıtsııa departamentiniń málimetinshe, er adam oblys ortalyǵyna táýlikke jalǵa alǵan «Chevrolet Cobalt» avtokóligimen kirmek bolǵan. Polıtsııa qyzmetkerleri ony «Ońtústik» baqylaý-ótkizý beketinde toqtatty. Avtokólik salonynan psıhotroptyq zat salynǵan, aldyn ala ólshep oralǵan paketter tabylyp, tárkilendi.
Saraptama olardyń jalpy salmaǵy 120 gramm α-PvP esirtkisi ekenin kórsetti. Medıtsınalyq kýálandyrý onyń kannabınoıdtardy qoldanǵanyn anyqtady. Qazirgi ýaqytta kúdikti qamaýda otyr. Oǵan 7 jyldan 12 jylǵa deıin bas bostandyǵynan aıyrý jazasy kózdelgen.
Jyl basynan beri óńir polıtseıleri oblys ortalyǵyna esirtki jetkizýdiń 26 arnasynyń jolyn kesti. Buǵan deıin Petropavlda iri mólsherde esirtki taratpaq boldy degen kúdikpen Astana turǵyny ustalǵanyn jazǵan edik.
