SQO-da bıyl 30-dan astam qymbat, joǵary tehnologııalyq ota jasaldy
PETROPAVL. KAZINFORM — Soltústik Qazaqstan oblysynda joǵary tehnologııalyq otalar Petropavldaǵy kópbeıindi qalalyq jedel medıtsınalyq járdem aýrýhanasynda jáne kópbeıindi oblystyq aýrýhanada jasalady.
Áleýmettik medıtsınalyq saqtandyrý qory SQO fılıalynyń málimetinshe, birer jyl buryn mundaı ota jasatý úshin naýqastar Astanaǵa baratyn.
— Byltyr medıtsınalyq qyzmetter tegin medıtsınalyq kómektiń kepildik berilgen kólemi jáne MÁMS júıesi aıasynda kórsetildi. 2025 jyly jalpy somasy shamamen 163 mln teńgege 25 ota jasaldy. Onyń ishinde TMKKK boıynsha 10 operatsııa, MÁMS boıynsha 15 ota júrgizildi, — deıdi Áleýmettik medıtsınalyq saqtandyrý qory SQOF dırektorynyń mindetin atqarýshy Talǵatbek Tileýberdın.
Bıyl 204,7 mln teńgege 32 operatsııa jasaldy. Onyń ishinde kópbeıindi qalalyq jedel medıtsınalyq járdem aýrýhanasynda — 3, qalǵany kópsalaly oblystyq aýrýhanada istelingen.
— Joǵary tehnologııalyq operatsııalardyń quny 1,4 mln teńgeden 6,6 mln teńgege deıin jetedi. Sondyqtan bul qyzmetterdi alý úshin patsıenttiń MÁMS júıesinde saqtandyrylǵan mártebesi bolýy qajet, — deıdi Talǵatbek Tileýberdın.
Óńirde jasalǵan joǵary tehnologııalyq otalardyń qatarynda júrekke kardıoverter-defıbrıllıator ornatý, mı men moıyn tamyrlaryna endovaskýlıarlyq operatsııalar jasaý, mı arterııalaryna stent qoıý, jambas býynyn qaıta aýystyrý, omyrtqaǵa kúrdeli hırýrgııalyq ota sekildi kúrdeli medıtsınalyq qyzmetter bar.
Sonymen qatar, oblysta medıtsınalyq saqtandyrý máselesi de ózekti bolyp otyr. Maýsym aıyndaǵy málimet boıynsha, SQO emhanalarynda 516 myńnan astam adam tirkelgen. Alaıda olardyń 65 myńnan astamynyń MÁMS júıesinde saqtandyrylǵan mártebesi joq.
Buǵan deıin SQO-da óńir turǵyndary 15 medıtsınalyq uıymda ońaltýdan óte alatynyn jazǵan edik.
