SQO-da bıyl 24,5 mln kóshet otyrǵyzý josparlanǵan

PETROPAVL. KAZINFORM — Soltústik Qazaqstan oblysynda alty jylda 20 myń gektar alqapqa 122 mln túp aǵash egilýi tıis. 

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, 2021-2027 jyldarǵa shaqtalǵan keshendi jospar aıasynda qazirdiń ózinde oblys aýmaǵynda 74,5 mln dana kóshet egilgen. Orman sharýashylyqtarynda qazir 43 tálimbaq bar. Osy maqsatqa 70 ga aýmaq bólingen.

— Aǵash otyrǵyzý boıynsha keshendi jumys qolǵa alynǵan. Ormandy qorǵaý úshin reıdter ótedi. Jylda materıaldyq-tehnıkalyq bazamyz jańartylyp jatyr. Sondaı-aq ormandardy túrli zııankesterden qorǵaý boıynsha sharalar uıymdastyrylady.

Al egetin kóshetti daıyndaý birneshe kezeńnen ótedi. Tuqymdy jınaımyz, ony óńdep, saqtap, sapasyn tekserip, keıin orman tálimbaqtaryna sebemiz. Ónip shyqqannan keıin onyń qýrap ketpeýi mańyzdy. Ýaqtyly sýarý, kúnnen qorǵaý, aramshóbin julý. Jalpy qaraǵaı kóshetin biz eki jyl ósiremiz. Qaıyńdy bir jyldan keıin otyrǵyzýǵa bolady. Belgili bir talaptarǵa saı kelgende biz kóshetterdi tálimbaqtan memlekettik orman qoryna egemiz, — deıdi basqarmanyń bólim basshysy Vasılıı Labanchýk.

Byltyr, mamandardyń aıtýynsha, 3 362 ga aýmaqqa 24,5 mln dana kóshet otyrǵyzylyp, meje 100% oryndaldy. Keshendi jospardy júzege asyrýǵa jergilikti bıýdjetten 410 mln teńge bólindi.

Bıyl da 24,5 mln kóshet otyrǵyzý mindeti tur.

— Aǵash otyrǵyzatyn jerdi anyqtaý úshin memlekettik orman qory aýmaǵyndaǵy 728 ga-da geobotanıkalyq zertteý júrgizildi. Kúzde 6,9 tonna aǵash tuqymy jınaldy.

Ýaqytsha tálimbaqtardyń aýmaǵyn úlkeıtip jatyrmyz. Byltyr kúzde 15 ga alqapqa tuqym sebildi. Ol jerden 15-18 mln kóshet alýdy josparlap otyrmyz, — deıdi basqarma mamany Sáýle Súleımenova.

Qazirgi ýaqytta SQO-nyń orman qory 688 myń ga jerdi alyp jatyr. Onyń 135 myń ga «Kókshetaý» ulttyq tabıǵı parki aýmaǵynda ornalasqan. Ormandardyń 85% — qaıyń, tek 4% ǵana — qylqan japyraqty aǵashtar.

Buǵan deıin «Ertis ormanynda» qar toqtatý jumystary júrgizilip jatqanyn jazǵan edik.