SQO-da bıyl 200 jasóspirim spırttik ishimdik iship ustaldy
PETROPAVL. KAZINFORM — Soltústik Qazaqstan oblysynda jańa oqý jyly qarsańynda óńirdegi ár mektepke jaýapty polıtsııa qyzmetkerleri bekitildi.
Óńirlik kommýnıkatsııalar qyzmetinde ótken brıfıngte jańa oqý jylyndaǵy balalardyń qaýipsizdigi sóz boldy. Jospar boıynsha 1 qyrkúıek kúni Polıtsııa departamentiniń qurylymdyq bólimsheleriniń basshylary mektepterde oqýshylarǵa profılaktıkalyq dárister ótkizedi. Kezdesýler barysynda quqyq buzýshylyqtyń aldyn alý, qaýipsizdik erejelerin saqtaý jáne balalardyń durys minez-qulqyn qalyptastyrý máselelerine basymdyq beriledi.
Al birer kúnnen keıin Polıtsııa departamentiniń basshylyǵy ata-analarmen úlken jıyn ótkizip, kámeletke tolmaǵandardyń qaýipsizdigine qatysty ózekti máselelerdi talqylamaq.
— Óńirde «Balalarǵa nazar aýdaryńyz!» jedel-profılaktıkalyq is-sharasy ótip jatyr. Onyń maqsaty — balalar arasyndaǵy quqyq buzýshylyqtyń jáne olarǵa qatysty qylmystardyń aldyn alý, sondaı-aq kámeletke tolmaǵandardyń joldaǵy qaýipsizdigin qamtamasyz etý. Máselen jyl basynan beri zańnama talaptaryn buzǵany úshin 3 780 jasóspirim ákimshilik jaýapkershilikke tartyldy, — deıdi SQO PD qoǵamdyq qaýipsizdik basqarmasynyń bastyǵy Álibek Ǵabdýllın.
Polıtseıdiń aıtýynsha, eń jıi kezdesetin quqyq buzýshylyq — jasóspirimderdiń túngi ýaqytta eresektersiz jalǵyz júrýi. Jyl basynan beri mundaı 2 378 fakt anyqtalǵan.
Sonymen qatar ata-analardyń bala tárbıesine qatysty mindetterin oryndamaýy boıynsha 976 derek tirkelgen. Kámeletke tolmaǵandardyń alkogoldik ishimdik ishýine baılanysty — 200, usaq buzaqylyq boıynsha — 153, al jasóspirimderdi oıyn-saýyq oryndaryna kirgizýge qatysty 30 fakt anyqtalǵan.
Polıtsııa ata-analardy jasóspirimderdiń qaýipsizdigine jaýapkershilikpen qaraýdy eskertedi. Qoldanystaǵy talaptarǵa sáıkes, balalardyń saǵat 23:00–den 06:00–ge deıin zańdy ókilinsiz turǵynjaıdan tys jerde júrýine jol berilmeıdi.
Al oıyn-saýyq oryndarynyń ókilderi kámeletke tolmaǵandardyń mundaı nysandarda 22:00–den 06:00–ge deıin bolýyna jol bermeýi tıis. Bul talaptardy buzý ákimshilik jaýapkershilikke ákep soǵady.
Polıtsııa ókilderi balanyń qaýipsizdigi tek quqyq qorǵaý organdarynyń mindeti emes ekenin ata-analardyń baqylaýy men jaýapkershiligi de mańyzdy ekenin atap ótti.
Buǵan deıin SQO-da jasóspirimder arasyndaǵy qylmys 41 paıyzǵa óskenin jazǵan edik.
