SQO-da bıyl 200 mln teńgege turǵyndarǵa qymbat ota jasalǵan

PETROPAVL. KAZINFORM – Soltústik Qazaqstan oblysynyń turǵyndaryna bıyl 30-dan astam joǵary tehnologııalyq medıtsınalyq qyzmet kórsetildi.

Áleýmettik medıtsınalyq saqtandyrý qory oblystyq fılıalynyń málimetinshe, keýde qolqasyna protezdi endovaskýlıarlyq ımplantatsııalaýdyń quny 4 mln teńgeden asady. Naýqastyń qorǵa qansha qarajat aýdarǵany mańyzdy emes, eń bastysy saqtandyrylǵan bolýy tıis.

– Jyl basynan beri óńir turǵyndaryna jalpy somasy 198,9 mln teńgeniń 31 joǵary tehnologııalyq medıtsınalyq qyzmeti kórsetildi. Onyń ishinde 19 ota MÁMS esebinen, 12-si tegin medıtsınalyq kómektiń kepildik berilgen kólemi aıasynda jasaldy. Máselen kópbeıindi oblystyq aýrýhananyń kardıoortalyǵynda otalardyń quny 650 myń teńgeden bastalady, - deıdi qordyń oblystyq fılıal dırektorynyń orynbasary Talǵatbek Tileýberdın. 

Mamannyń aıtýynsha, bıylǵy jarty jylda óńirde eki medıtsınalyq uıym joǵary tehnologııalyq medıtsınalyq qyzmet kórsetti. 

– MÁMS aıasynda kópsalaly oblystyq aýrýhana óńir turǵyndaryna 18 joǵary tehnologııalyq medıtsınalyq qyzmet kórsetti. Bas jáne moıyn tamyrlaryn jabý boıynsha 7 ota, keýde qolqasyna protezdi ishten ornatý boıynsha 1 ota jasalyp, júrek soǵýyn avtomatty túzeıtin qural 4 adamǵa ornatylsa, mıdy qorektendiretin ishki arterııalarǵa stend ornatý boıynsha 6 ota jasaldy. Olardyń jalpy quny 119 mln teńgeden asty. Kópsalaly qalalyq aýrýhana 2 mln 130 myń teńgege patsıentke tize býynyn aýystyrý boıynsha 1 ota jasady, - deıdi Talǵatbek Tileýberdın. 

Buǵan deıin SQO-da skrınıngiden ótken ár úshinshi adamnan týberkýlez ınfektsııasy anyqtalǵanyn jazǵan edik.