SQO-da bıyl 20 adam býllıng úshin jazalandy
PETROPAVL. KAZINFORM – Soltústik Qazaqstan oblysynda polıtseıler jastarmen kezdesip, býllıng úshin qandaı jaza qarastyrylǵanyn eskertip jatyr.
SQO polıtsııa departamenti baspasóz qyzmetiniń málimetinshe, osyndaı kezdesýlerdiń biri - Petropavldaǵy Qyzmet kórsetý salasy kolledjinde ótti. Іs-sharaǵa ıývenaldy polıtsııa ınspektorlary men psıhologter qatysty.
- Býllıngti jastar kóbine tek fızıkalyq kúsh kórsetý dep túsinedi. Qysym kórsetýdiń aýqymy keń, ol - zattardy búldirý, boıkot jarııalaý, ósek taratý sııaqty áreketter arqyly da júzege asady.
Sondaı-aq áleýmettik jeliler men messendjerlerde júzege asatyn kıberbýllıng máselesine de erekshe nazar aýdarǵan jón, - deıdi mamandar.
Polıtseılerdiń sózinshe, keıbireýlerge ázil bolyp kórinetin áreket, shyn máninde, aýyr saldarǵa soqtyrýy múmkin. Sondyqtan júıeli túrde qorlaý men kemsitý faktileri úshin ákimshilik jaýapkershilik qarastyrylǵan. Eger quqyq buzýshy 12 men 16 jas aralyǵynda bolsa, aıyppul ata-anasyna salynady.
Al 16 jastan bastap adam ózi jaýap beredi, eskertý jasalyp, aıyppul salý jazasy qoldanylady. Mundaı fakti adamnyń bolashaqta jumysqa ornalasýyna da kedergi keltirýi yqtımal.
SQO Polıtsııa departamenti qoǵamdyq qaýipsizdik basqarmasynyń málimetinshe, jyl basynan beri óńirde býllıng faktileri boıynsha 20 adam ákimshilik jaýapkershilikke tartylǵan.
Buǵan deıin «111» baılanys ortalyǵyna balalar kóbine qandaı máselelermen habarlasqanyn jazǵan edik.
Esterińizge salaıyq, Qazaqstanda 1 qyrkúıekten bastap «DosbolLIKE» antıbýllıngtik baǵdarlamasy iske qosyldy.