SQO-da bıyl 122 sottalǵannyń jazasy qatańdatyldy

PETROPAVL. KAZINFORM — Petropavlda probatsııa esebinde turǵan sottalǵan qashyp ketpek boldy.

Soltústik Qazaqstan oblysy boıynsha qylmystyq-atqarý júıesi departamenti baspasóz qyzmetiniń málimetinshe, sottalǵannyń bas bostandyǵy shektelip, probatsııalyq esepke alynǵan. Júris-turysy elektrondy bilezik arqyly baqylaýda bolǵan.

Er adam jazasyn óteýden jaltarmaq boldy. Elektrondyq baqylaý quralynyń sıgnaly joǵalǵanyn ınspektorlar der kezinde baıqap, sottalǵannyń turǵylyqty jerine attandy. Nátıjesinde ony búlingen bilezikpen qaladan ketpekshi bolǵan jerinen ustady.

Keıin belgili bolǵandaı, er adam dostarymen basqa qalaǵa barmaq bolǵan.

— Buǵan deıin de sottalǵan birneshe ret turǵylyqty jerin belgilenbegen ýaqytta tastap, sottyń talaptaryn buzǵan. Osyǵan baılanysty probatsııa qyzmetiniń qyzmetkerleri bas bostandyǵyn shekteý jazasyn bas bostandyǵynan aıyrý jazasyna aýystyrý týraly materıaldy sotqa joldady, — dedi SQO QAJD mamandary.

Jalpy jyl basynan beri SQO-da 122 sottalǵanǵa ártúrli quqyq buzýshylyqtar, sonyń ishinde elektrondyq baqylaý quraldaryn qasaqana búldirgeni úshin jaza bas bostandyǵynan aıyrýǵa aýystyryldy.

Buǵan deıin Petropavlda sorǵy stantsııasyn jóndeýge arnalǵan qarajatty jymqyrǵan basshy sottalǵanyn jazǵan edik.