SQO-da bıyl 1200-den astam dıqannyń quqyǵy qorǵaldy

PETROPAVL. KAZINFORM — Soltústik Qazaqstan oblysynda ósimdik sharýashylyǵyn damytýǵa bıyl 36,5 mlrd teńge sýbsıdııa bólindi, bul byltyrǵyǵa qaraǵanda 16 mlrd teńgege artyq.

Petropavlda kásipkerler palatasynda aýyl sharýashylyǵy taýaryn óndirýshilerdiń quqyǵyn qorǵaýǵa arnalǵan is-shara ótti. Jıynda qaralǵan máselelerdiń biri — tyńaıtqyshtardy sýbsıdııalaý kóleminiń jetkiliksizdigi. «Melenchýk ı K» JShS basshysy Evgenıı Melenchýk 17 myń tonna sýbsıdııalanǵan kólem barlyq sharýashylyqtardyń qajettilikterin ótemeıtinin atap ótti. 

— Jaqynda aýyl sharýashylyǵy basqarmasy 17 myń tonna tyńaıtqysh úshin «QazAzotqa» aqsha tólep, sýbsıdııalady. Bul óte az ǵoı. 17 myń tonna shamamen 40-50 myń gektarǵa ǵana jetedi. Oblystaǵy bir sharýashylyq, máselen Zenchenkonyń alqaptaryn da tolyq óńdeýge jetpeıdi. Biz tolyq baǵamen satyp alýǵa daıynbyz, biraq aqshany qaıdan alýǵa bolady? — dedi kásipker.

Aýyl sharýashylyǵy jáne jer qatynastary basqarmasynyń basshysy Dáýren Toqkýjınovtyń aıtýynsha, sharýashylyqtar tyńaıtqysh alǵylary kelse, otandyq zaýyttar — «QazAzot» AQ jáne «Qazfosfat» JShS jyl basynda ótinim berýleri qajet.

— Búgingi tańda biz osy zaýyttarmen 79 myń tonnaǵa, onyń ishinde 30 myń tonnasy — «QazAzot», qalǵany boıynsha «Qazfosfatpen» kelisimshart jasastyq. «QazAzottan» tyńaıtqyshtardy jetkizýde problema joq, barlyq jóneltilimder jospar boıynsha júredi. «Qazfosfat» buryn 60% aldyn ala tólemdi talap etken bolatyn, biraq Aýyl sharýashylyǵy mınıstrliginiń aralasýynan keıin jaǵdaı ózgerdi, qazir shartqa otyrýda másele joq, — deıdi Dáýren Toqkýjınov.

Alaıda, kásipkerdiń aıtýynsha, «QazAzot» tyńaıtqyshtardy tek mamyr aıynda jetkizýge ýáde etken. Bul aýylsharýashylyq jumystaryn júrgizýge tym kesh. Basqarma basshysy bul máseleni sheshýge ýáde etti.

Jalpy SQO Kásipkerler palatasy men Sybaılas jemqorlyqqa qarsy qyzmettiń birlesken «Bızneske jol» jobasy aıasynda óńirde 11 másele sheshilip, 1200-den astam sharýashylyq ókiliniń quqyǵy qorǵaldy.

— Óńirlik kásipkerler palatasymen birlesip aýyl sharýashylyǵy salasy boıynsha óńirdiń bıznes-pasporty ázirlendi. Bıznestiń problemalyq máselelerin sheshý úshin sarapshylar pýly bekitildi, oǵan aýyl sharýashylyǵy basqarmasynyń, sondaı-aq kásipkerler palatasynyń salalyq keńes ókilderi kirdi. Mysaly, biz Atyraý munaı óńdeý zaýytynan sapasyz dızel otynyn jetkizý máselesin sheshtik. Otynnyń bul túri klımattyq sıpattamalary boıynsha bizdiń aımaqqa sáıkes kelmeıdi jáne 0 gradýs temperatýrada qatyp qalady. Energetıka mınıstrligine júgingennen keıin otyn Pavlodar munaı — hımııa zaýytynyń dızeline aýystyryldy, — deıdi Sybaılas jemqorlyqqa qarsy qyzmettiń SQO boıynsha departamenti preventsııa basqarmasynyń basshysy Marat Ahmetov.

Buǵan deıin SQO-da bıyl 4,4 mln ga dándi daqyldar egý josparlanǵanyn jazǵan edik.