SQO-da bıyl 1,2 myń km jol jóndeýden ótedi
PETROPAVL. KAZINFORM – Soltústik Qazaqstan oblysynda byltyr 1 myń km jol jóndeldi. Bıyl jumys jalǵasyp, jol jelisiniń normatıvti jaǵdaıyn 85% jetkizý mindeti tur.
SQO Jolaýshylar kóligi jáne avtomobıl joldary basqarmasynyń málimetinshe, óńir avtomobıl joldarynyń uzyndyǵynan el boıynsha ekinshi orynda tur. Bıyl 8416 shaqyrymnyń 1,2 myń km jóndeledi.
- Onyń ishinde 800 km – jergilikti joldar, 467 km – respýblıkalyq mańyzdaǵy jáne qalǵany kóshe joldary. Jumys «Petropavl-Jezqazǵan» respýblıkalyq mańyzdaǵy joldyń Pokrovka-Petropavl ýchaskesinde júrgiziledi. Sondaı-aq Qaırankól-Blagoveşenka, Dáýit-Kishkenekól, Meńkeser-Razdolnoe, Gorkovskoe-Voshodskoe, Kishkenekól-Qaraterek eldi mekenderiniń aralyǵyndaǵy joldar jóndeledi. Atqarylatyn jumystyń 80% -y ortasha jóndeý, - deıdi basqarma basshysy Erden Shortybaev.
Máselen, Aıyrtaý aýdanynda ınfraqurylymdy damytýǵa asa mán berilip keledi. Óıtkeni munda Imantaý-Shalqar kýrorttyq aımaǵy ornalasqyn. Byltyr «Sokol» balalardyń demalys ortalyǵyna 400 mln teńgege jol salyndy. «Arman», «Týrpan» jáne «Olımpıets» demalys oryndaryna 6,4 km jol 369 mln teńgege asfalt tóseldi.
- Bıyl da demalys oryndaryna, Nıkolskoe aýylyndaǵy «Botaı» mýzeı-qoryǵyna, Syrymbet aýylyndaǵy «Aıǵanym» úı-jaıyna jalpy uzyndyǵy 19 km jol tóseledi. 3 mlrd teńgege «Saýmalkól-Syrymbet-Qaraqamys-Svetloe» - 71 km avtojolyn jóndeý jumysy júrip jatyr. 44 km-ne asfalt tóseldi, bıyl 27 km jóndeý jumystary júrgiziledi, - deıdi Aıyrtaý aýdanynyń ákimi Meıram Meńdibaev.
Petropavlda kóshe joldarynyń jalpy uzyndyǵy – 366 km. Onyń 182 km – asfalti joq qara jol. Qala bıligi bes jyl ishinde bul joldardyń barlyǵyn retke keltirmek.
- Byltyr 32 kósheniń 28 km qara jolyna asfalt tóseldi. Al jalpy 49 kósheniń 53,9 km jóndeldi. Bıyl 45 kóshe boıynsha ortasha jóndeý jumystaryn júrgizý josparlanǵan, onyń 42-si alǵash ret asfalttalatyn bolady. Onyń ishinde «Birlik» shaǵyn aýdanyndaǵy kósheler de bar. Osy maqsatqa oblystyq bıýdjetten 5 mlrd teńge bólindi, - deıdi Petropavl ákimi Serik Muhamedıev.
Buǵan deıin SQO-da eldi mekenderdiń 59 paıyzynda ǵana mádenıet nysandary jumys istep turǵanyn jazǵan edik.