SQO-da «Ańsaǵan sábı» baǵdarlamasy arqyly 102 bala dúnıege keldi
PETROPAVL. KAZINFORM — Soltústik Qazaqstan oblysynda bıyl 4,2 myń náreste týdy.
Jańa jyl qarsańynda ómirge sábı ákelgen kópbalaly analardy óńir basshysy Ǵaýez Nurmuhambetov perınataldyq ortalyqqa baryp quttyqtady.
Birer kún buryn Ásemgúl Sagıtova men Manat Mahanbetalıeva ómirge altynshy balasyn ákeldi. Dúnıege deni saý náreste keldi.
Oblys ákimi jas analardy quttyqtap, syılyq tabys etti.
— Bizdiń óńir ana men jańa týǵan sábıdiń densaýlyǵyn birinshi orynǵa qoıady, sapaly medıtsınalyq kómek jáne qamqorlyq kórsetiledi. Ortalyqta barlyq jaǵdaı jasalǵan, 53 tájirıbeli dárigerden turatyn personal jumys isteıdi. Sondaı-aq, 10 akýsher-gınekolog bıýdjet esebinen rezıdentýrada oqyp jatyr. Bul óńirdiń medıtsınalyq kadrlyq áleýetin nyǵaıtýǵa yqpal etedi. Bıyl óńirde 4,2 myń bala dúnıege keldi. Sondaı-aq, bala súıýdi armandaǵan otbasylarǵa qoldaý kórsetemiz. Memleket basshysynyń tapsyrmasymen júzege asyp jatqan «Ańsaǵan sábı» baǵdarlamasy aıasynda qazirgi zamanǵy ádis — EKO qoldanylady. Osy jobanyń arqasynda tek bıyl 102 bala soltústikqazaqstandyq otbasylarǵa baqyt syılady, — dedi Ǵaýez Nurmuhambetov.
Oblys ákiminiń aıtýynsha, óńirde 7,4 myń kópbalaly otbasy bar. Olarǵa járdemaqy, ataýly áleýmettik kómek, jeńildikter, avtobýsta tegin júrý, turǵyn úımen qamtamasyz etý jáne jeńildetilgen ıpoteka beriledi. Bul sharalar kópbalaly otbasylardyń ómir sapasyn jaqsartýǵa jáne balalardy tárbıeleý úshin qolaıly jaǵdaılar jasaýǵa baǵyttalǵan.
Bıyl perınataldyq ortalyqta 42 — egiz, bir úshem dúnıege keldi.
Sondaı-aq, merziminen erte týǵan 299 shaqalaqqa kómek kórsetildi.
Buǵan deıin bıyl sábılerge qoıylǵan eń tanymal esimder jaıly jazǵan edik.