SQO-da «bıg beg» óndirisi qolǵa alyndy
Jańa kásiporyn buǵan deıin bos turǵan ǵımarattarda ornalasatyn bolady. Bul jaıynda SQO ákimi Qumar Aqsaqalov óziniń áleýmettik jelidegi paraqshasynda jazdy.
«Óńirdegi iri kásiporyndar karantınge qaramastan jumys istep jatyr. Ol jerlerde karantın talaptary qatań saqtalǵan. Jumysshylardyń dene qyzýy ólshenedi, qyzmetkerleri úıden jumysqa avtobýstarmen tasymaldanady. Ǵımarat únemi sanıtarlyq jáne dezınfektsııalyq óńdeýden ótedi. Oblysta orta-shaǵyn bıznes sýbektileri men shaǵyn kásiporyndar ǵana ýaqytsha jumysyn toqtatty. Óıtkeni olarda kelip-ketetin halyq kóp, qadaǵalaı múmkin emes», - deıdi Qumar Aqsaqalov.
Ýaqytsha qıyndyqtarǵa qaramastan óńirde mańyzdy ınvestıtsııalyq jobalar júzege asyrylyp jatyr. Bos turǵan ǵımarattar qalpyna keltirilip, ol jerler jańa óndiris oryndaryna berilgen. ⠀
«Jaqynda Petropavlda «bıg beg» shyǵaratyn jańa kásiporyn jumysyn bastaıdy. Jumsaq konteınerler túrli ónimdi – dándi daqyldardy, qurylys materıaldaryn saqtaý úshin qoldanylady. Investorlarǵa bos turǵan úsh ǵımaratty usyndyq. Jalpy aýmaǵy 10 myń sharshy metr. Olardyń bireýi jóndeldi, qalǵan ekeýi qalpyna keltirilip jatyr. Memleket qajetti ınfraqurylymdy ǵımarattarǵa tartyp beredi», - dep jazdy oblys ákimi.
Qumar Aqsaqalovtyń aıtýynsha, ınvestorlar bul jobaǵa 600 mln teńge jumsamaq. Jańa fabrıkaǵa 135 adam jumysqa qabyldanady. Olar jylyna 1,5 mln «bıg beg» shyǵaratyn bolady.