SQO-da bıdaıdan janarmaı qospasyn óńdeıtin zaýyt iske qosylady
NUR-SULTAN. QazAqparat - Soltústik Qazaqstan oblysynda bıdaıdy janarmaı óndirisine qoldanatyn zaýyt salynyp jatyr. Bul týraly Ortalyq kommýnıkatsııalar qyzmetinde ótken brıfıngte aıtyldy, dep habarlaıdy QazAqparat tilshisi.
«Byltyr krahmal-glıýten óńdeıtin óndiris jelisi iske qosyldy. Bıyl sonyń ekinshi jelisin qostyq. Bul - Qazaqstandaǵy bıdaıdy tereń óńdeıtin jalǵyz zaýyt. Jobanyń quny – 11 mlrd teńge», - deıdi SQO ákimi Qumar Aqsaqalov.
Onyń aıtýynsha, mundaı zaýyttar álemde sanaýly.
«Óńdeý kólemi – jylyna 3 myń tonnaǵa deıin jetedi. Kelesi jyldyń basynda osy zaýytta bıoetanol óńdeıtin jeli iske qosylady. Bıoetanol degenimiz – joǵary sapaly benzın alýǵa qajet qospa. Búginde benzın óndirý kezinde metanol qospa retinde qoldanylady. Bul – gazdy qaıta óńdeý arqyly alynatyn ónim. Avtomobıl tútininen qorshaǵan ortanyń lastanýyna osy metanoldyń áseri joǵary. Metanol bizge túgeldeı shetelden ımporttalady. Almaty sııaqty iri qalalarda aýanyń lastanýyna osy metanol sebepker. Al eger janarmaıdy bıetanol arqyly alýdy jolǵa qoısaq, qorshaǵan ortaǵa tastalatyn ýly tútinniń mólsherin aıtarlyqtaı azaıtar edik. Jobaǵa salynǵan ınvestıtsııanyń kólemi 11 mlrd teńgege jýyq», - deıdi ol.
Atalmysh zaýytta 500 adam jumys isteıtin bolady.
Eske sala ketsek, buǵan deıin SQO-da qansha kópbalaly otbasy baspanaly bolatyny týraly jazǵan bolatynbyz.
Sondaı-aq, aımaq basshysy qansha gektar jer memleketke qaıtarylatyny jáne týrızm salasyn damytýǵa múmkindik kóp ekenin aıtty.
