SQO-da bıdaıdan bıoetanol men krahmal óndiretin zaýyt iske qosyldy
PETROPAVL. QazAqparat - Soltústik Qazaqstan oblysynyń Taıynsha aýdanynda óńir basshysy Qumar Aqsaqalovtyń qatysýymen bıoetanol, krahmal jáne jelimtik óndiretin zaýyt iske qosyldy, dep habarlaıdy QazAqparat.
SQO ákimdiginen málim etkendeı, «Bio operations» zaýyty bútin elimiz úshin strategııalyq mańyzǵa ıe óndiris oshaǵy. Jalpy ınvestıtsııa kólemi - 11 mıllıard teńge. Kásiporyn jylyna 300 myń tonna bıdaıdy óńdeı alady. Óndiriske tek jergilikti shıkizat qoldanylady.
«Álemde mundaı birneshe zaýyt qana bar. Munda 400 adam jumys isteıtin bolady jáne olardyń barlyǵy jergilikti turǵyndar. 50 myń basqa shaqtalǵan shoshqa kesheni de jumysyn jańǵyrtty. Jýyq arada Ortalyq Azııadaǵy teńdesi joq et kombınaty da iske qosylady. Kombınattyń qýattylyǵy - 15 myń tonna et. Bolashaqta jumyspen 1 myń adam qamtylmaq. Bıýdjetke jylyna 100 mıllıon teńge salyq túsedi», - dedi Qumar Aqsaqalov.
Búgin zaýytta krahmal men jelimtik shyǵaratyn tseh iske qosyldy. Kelesi jyly onda bıoetanol óndirile bastaıdy. Bıoetanol benzınniń oktan sanyn kóbeıtip, ekologııalyq taza qylady. Qazir elimizdiń munaı óńdeý zaýyttarymen bıoetanoldy jetkizý boıynsha kelissózder júrgizilýde. Otandyq munaı zaýyttarynyń Eýro-5 benzınin shyǵarýǵa kóshkenin eskersek, otandyq bıoetanolǵa suranys joǵary bolady.
