SQO-da Beskól aýylynyń 80 úıi ortalyq jylý júıesine qosylady
PETROPAVL. QazAqparat – Soltústik Qazaqstan oblysy Qyzyljar aýdanyndaǵy jylýmen jabdyqtaıtyn taratýshy jelilerdiń qurylys barysy «Qutty meken» ulttyq jobasy aıasynda baqylaýǵa alyndy, dep habarlaıdy QazAqparat tilshisi.
«Nur Otan» partııasy SQO fılıaly baspasóz qyzmetiniń málimetinshe, partııanyń Qyzyljar aýdandyq fılıalynyń monıtorıngtik top músheleri jóndeý júrip jatqan nysanda boldy. Beskól aýylynda ortalyq qazandyq ta kúrdeli jóndelip, bıyl paıdalanýǵa beriledi. Qazirgi ýaqytta ortalyq qazandyqqa 46 nysan, onyń ishinde 15 kóppáterli turǵyn úı qosyldy. Bıyl taǵy 34 turǵyn úıdi qosý josparlanǵan.
Qazandyqty jóndeýge, toraptyq jáne taratýshy jelilerdiń qurylysyna 1 mlrd 865 mln teńge jumsalady.
«Qazandyqty aǵymdaǵy jóndeýge oblystyq bıýdjetten 40 mln teńge bólindi. Qazirgi ýaqytta jumystar aıaqtalýda: kúl shyǵarý jelisi jóndeldi, negizgi bólshekteri jańasyna aýystyryldy, qaraý alańy, 4 qazandyq jónge keltirildi», - deıdi jumystardy atqaryp jatqan merdiger «Mehkolonna Remstroıservıs» JShS dırektory Leonıd Rapatsevıch.
Mamandardyń aıtýynsha, aýyldaǵy ortalyq qazandyq 2013 jylǵa deıin jumys istemedi. Al sońǵy salynǵan úıler alty jyldan beri ortalyq qazandyqtan jylytylyp keledi. Turǵyndardyń aıtýynsha, úıler jyly, másele týyndamaǵan.
«Úıde árqashan jyly. Jylý berý maýsymy bastalysymen birden qosylamyz. Kórshilerdiń tarapynan da narazylyq týǵan emes. Ortalyqtandyrylǵan jylý júıesine odan da kóp úıler qosylsa degen tilek bar. Men sııaqty zeınetkerlerge bul óte yńǵaıly. Otyn-kómir satyp alýdyń, ony tasyp, kúlin shyǵarýdyń qajeti joq. Partııa qurylysty baqylaýǵa alǵanyn bilemin, bul jaqsy», - deıdi Beskól turǵyny Ásııa Jaqypova.
Qyzyljar aýdanynda 100-den astam nysannyń qurylysy júrip jatyr. Olardyń barlyǵy «Qutty meken» ulttyq jobasy aıasynda «Nur Otan» partııasy aýdandyq fılıalynyń partııalyq baqylaý komıssııasynyń jáne monıtorıngtik tobynyń turaqty baqylaýyna alynǵan.
