SQO-da bes jylda memlekettik-jekeshelik áriptestik aıasynda 42 joba júzege asty
SQO kásipkerler palatasy baspasóz qyzmetiniń málimetinshe, «Qazaqstannyń memlekettik-jekeshelik áriptestik ortalyǵy» AQ ókilderi kásipkerler palatasy janynan qurylǵan isker áıelder keńesiniń múshelerimen kezdesti.
Jıynǵa jergilikti atqarýshy organ ókilderi onlaın qosyldy.
Oblystyq kásipkerler palatasynyń bólim basshysy Aslan Nurseıitovtyń aıtýynsha, óńirde memlekettik-jekeshelik áriptestik ekonomıkanyń barlyq salasyn qamtyǵan.
«Memlekettik-jekeshelik áriptestik týraly zań qabyldanǵannan beri SQO-da 42 kelisim shart jasaldy. Tartylǵan ınvestıtsııa kólemi – 10,4 mlrd teńge. Onyń 9,3 mlrd teńgesi qaıtarylýy kerek bolsa, osy kúnge deıin kásipkerlerge 3,9 mlrd teńgesi tólendi. Bıyl osy mehanızm arqyly 7 joba júzege asady. Onyń ekeýi bilim, bireýi – densaýlyq saqtaý, ekeýi – turǵyn úı-kommýnaldyq sharýashylyq salalaryn qamtysa jáne bireý jolǵa qatysty», - deıdi Aslan Nurseıitov.
Sonyń ishinde qoqys suryptaý kesheniniń qurylysy da bar.
«Qazaqstannyń memlekettik-jekeshelik áriptestik ortalyǵy» AQ ókilderiniń pikirinshe, pandemııanyń saldarynan jobaǵa qatysýǵa tilek bildirýshiler azaıǵan.
«Taǵy bir sebebi – joba mehanızminiń kúrdeliligi. Memlekettik-jekeshelik áriptestik elimizde 2016 jyldan beri júzege asyp keledi. Burynnan qatysqandar onyń múmkindikterin kórip, bildi. Bul jerde tez, ári ońaı tabysqa jetý múmkin emes. Memlekettik-jekeshelik áriptestik – uzaq ýaqytqa baǵyttalǵan joba. Sondaı-aq qazir mektep qurylysyna basymdyq berip jatyrmyz. Óıtkeni elimizde áli kúnge deıin eki-úsh aýysymda oqytatyn jáne eski mektepter bar. SQO-da da bilim ordalaryna suranys joǵary. Memlekettik-jekeshelik áriptestik arqyly kásipkerler bul jobalarǵa qatysa alady», - deıdi «Qazaqstannyń memlekettik-jekeshelik áriptestik ortalyǵy» AQ front-keńse jobalarynyń basqarýshysy Mahabbat Isabekova.
