SQO-da bes jylda 400-den astam aýyl mektebi jańǵyrtylmaq
PETROPAVL. QazAqparat – Soltústik Qazaqstan oblysynda bıyl 2 mlrd teńgege 21 mektep kúrdeli jóndelmek, dep habarlaıdy QazAqparat tilshisi.
SQO bilim basqarmasynyń alqa otyrysynda vedomstvo basshysy Názir Jáshibekov bıyl da bilim berý nysandaryn jóndeý jumystary jalǵasyn tabatynyn jetkizdi. Búginde osy salaǵa oblys bıýdjetiniń 35 %-y baǵyttalyp keledi. Nátıjesinde byltyr 4 mlrd teńgege 52 mektep kúrdeli jóndeldi. Osylaısha sońǵy úsh jyl ishinde oblys mektepteriniń 64 %-y jónge keltirildi.
«Byltyr elde «5000 mektepti jańǵyrtý» jobasy bastaldy. Sonyń aıasynda byltyr 84 aýyl mektebiniń kitaphanalary, ashanalary jańǵyrtyldy. Pándik kabınetter, jıhaz jáne 237 mln teńgege 18 avtokólik satyp alyndy. Bıyl 24 nysan, sonyń ishinde 21-i «Aýyl – el besigi» baǵdarlamasy aıasynda jóndeledi. Sondaı-aq 28 pándik kabınetti, mektep jıhazyn, kórkem ádebıetti, lızıngke 29 mektep avtobýsyn satyp alýdy josparladyq. 44 bilim berý mekemesiniń qazandyǵy aýystyrylady. Jalpy 5 jyl ishinde 416 mektepti jańǵyrtamyz», - deıdi Názir Jáshibekov.
Byltyr oblys ortalyǵynyń tolyq komplektili mektepteri jan basyna qatysty qarjylandyrýǵa kóshti. Osylaısha 47 mektep óz qarjysyn óz keregine jumsaýǵa múmkindik aldy.
«Oryn jetispeýshiligi, apatty jáne úsh aýysymda oqytatyn mektepter máselesin sheshý mindeti tur. Ásirese oblys ortalyǵynda mektepterge bala syımaı jatyr. Buǵan deıin 600 jáne 900 oryndyq eki mektep salyndy. Byltyr 900 orynǵa arnalǵan taǵy bir mektep paıdalanýǵa berildi. «Kopaı» aýdanynda 1200 oryndyq bilim ordasyn salýdy josparlap otyrmyz. Bul Petropavldaǵy qajettilikti tolyq qanaǵattandyrady. Budan basqa Taıynsha aýdanynyń Vıshnevka eldi mekeninde apattyq mekteptiń ornyna 120 oryndyq jańasy salynyp jatyr», - deıdi basqarma basshysy.
